ПОБЕДАЛӦН ВУНЛЫТӦМ ТУЛЫС


Кор енэжсянь шондіыс дзирдаліс яр,
Кор ловзис и ваыс, и муыс,
Да доналӧм сынӧдас ыпъяліс жар,
Сэк воис Победалӧн тулыс.

Вот кольӧны вояс, но некор оз ло,
Мед паметьным та йылысь кусіс:
Ми вир сорӧн, тшын-би пыр кыссим нёль во,
Мед пуксис Победалӧн тулыс.

Кӧть сёрджык тэ чужлін, но статя да ён,
Сувт миянкӧд тшӧтш знамя улас,
Мед сьӧлӧмад йиджтысяс тэныд, том зон,
Победалӧн вунлытӧм тулыс.

А кодкӧ кӧ лӧсьӧдӧ бара выль дой,
Сё ранаӧн парсалӧм мулы,
Ми казьтылам налы, мый тӧдлім сьӧд вой,
Да вӧлі Победалӧн тулыс.

А сынӧдыс сӧстӧм да енэжыс лӧз,
И тӧвруыс бан боктӧ нюлӧ.
Мед дзирдалас шонді, мед пасъясны йӧз
Победалысь лунсӧ быд тулыс.