* * *

Пемыд енэж вывті
Эзысь тӧлысь кывтіс,
Ӧшиньӧй пыр жырӧ
Югыд сылӧн пырис.
Кутшӧм яра сьӧлӧм йӧктӧ,
Вирӧй ворсӧ, овны тшӧктӧ!
Кутшӧм кокньыда мем овсьӧ,
Кулӧмысь оз весиг повсьы.

Кодыр ме, кыдз кывлі, чужи,
Видзӧдлӧма вӧлӧм
Енэж шӧрсянь вылам сэки
Мелі синнас тӧлысь.
Сійӧ ж видзӧдлӧмсӧ ӧні
Синмӧй аддзӧ бара —
Меным лӧсьыд, меным долыд,
Сьӧлӧм йӧктӧ яра.
Бурсиа ме чужан часлы,
Му выв долыд сьӧлӧмъяслы.