ПЕЧКЫСЬ

Швыргы, швыргы, каттьӧмӧй, —
Вугыр эн на босьт!
Нюжав, нюжав, кузяӧй,
Гармы да эн ор.
Лов выв лэптӧ рытйыны
Печкан помын мем. —
Тадз жӧ коркӧ ныв дырйи
Тыртавлі каттьӧм.
«Кипиристі Сӧкӧлӧс»
Мыла сьылігмоз —
Асыввылыс гӧрдӧдтӧдз
Лэдзлі кудель тош.
Кольӧма тай, лэбзьӧма
Сэкся оландыр;
Пӧрысьладор жебмӧма
Водзпӧрдырся вын.
Кыдз бы эськӧ нюжтыны
Кузя йылӧс мем. —
Ещӧ на кӧть гуыштны
Во-мӧд содтӧд нэм.

Пӧчӧ, пӧчӧ, сьылышта
Тэнсьыд сьыланкыв.
Гусьӧникӧн липсышта...
Пӧчӧ, он нин кыв
Менсьым, зарни пиыдлысь,
Шуна сьыланкыв.