ОЙ, ТЭ, ИЗЬВА

Изьва берегӧд надзӧник муна,
Эзысь веркӧсӧн сералӧ ю.
Кыдз нӧ сьӧлӧм оз пу?! — 
Ылыс войвывса му
Гӧгӧр дзирдалӧ шондіа лунӧн.
Ой, тэ, Изьва,
Югыд Изьва,
Сьӧлӧмӧс вӧрзьӧдан
Менсьым бур визьнад!

Море бердынӧсь кӧраяс ӧні,
Сэн пастукъяслы узьсяс-ӧ вой?
И оз личӧдны сой
Гортӧ кольӧм вок-чой, — 
Видз выв уджъясӧ зэвтчӧма сӧнныс.
Ой, тэ, Изьва,
Югыд Изьва,
Сьӧлӧмӧс вӧрзьӧдан
Менсьым бур визьнад!

Миян олӧмыс мойдын моз кыптӧ,
Сійӧ быдӧнлысь ышӧдӧ лов.
Сідзкӧ, жугыль оз ов, 
Мортлӧн сьӧлӧм оз пов, — 
Мича сьыланкыв юргӧ быд сиктын.
Ой, тэ, Изьва,
Югыд Изьва,
Сьӧлӧмӧс вӧрзьӧдан
Менсьым бур визьнад!