ОШ, РУЧ ДА МУЖИК

Ӧтчыд ош да мужик ӧтув кӧдзисны сёркни. Кӧдзигӧн сёрнитчисны, кыдзи арын воӧм сёркни юкны.

Мужик и шуӧ:

— Ме вужсӧ босьта, а тэ дінсӧ да йывсӧ босьтан.

— Ладнӧ, — шуӧ ош, — тэ босьт вужсӧ, а ме дінсӧ да йывсӧ босьта.

Воис ар. Сёркни быдмис зэв бура. Мужик босьтіс вужсӧ, а ош — дінсӧ да йывсӧ. Гӧгӧрвоис ош ассьыс пӧръяссьӧмсӧ да шуӧ:

— Пӧръялін тэ менӧ, другӧ. Мӧдысь кӧ ещӧ мыйкӧ пондан кӧдзны, сэк ог нин пӧръяссьы.

Колис во. Мужик и бара шуӧ ошлы:

— Вай жӧ, другӧ, ӧтув сю кӧдзам.

— Кӧдзам, — шуӧ ош, — ми тэкӧд сю. Но ӧні тэ менӧ он нин пӧръяв. Тэныд иддзыс да йылыс, а меным вужйыс.

— Ладнӧ, — шуӧ мужик, мед тэныд лоас вужйыс, а меным иддзыс да йылыс.

Коркӧ воис сю. Вундісны, юкисны. Мужик вартіс сюсӧ, пӧжаліс тупӧсьяс, локтіс ош дінӧ да шуӧ:

— Вот, другӧ, кутшӧм сюыдлӧн йылыс.

— Но, — шуӧ ош, — ӧні ме тэ вылӧ лӧгаси. Тэ менӧ кыкысь пӧръялін, сы пыдди ме тэнӧ асьтӧ сёя.

Петіс мужик туй вылӧ, пуксис аслас телега дінӧ да пондіс шогсьыны. Буретш сэки вӧлі котӧртӧ руч да юалӧ мужиклысь:

— Мый нӧ, дядьӧ, шогсян? Кутшӧм шог тэнӧ суис?

— Кыдзи нӧ меным не шогсьыны, кор ош грӧзитчӧ менӧ сёйны.

— Эн шогсьы, — шуӧ руч, — оз сёй, ме тэныд отсала.

Руч котӧртіс туй бокӧ, дзебсис пуяс сайӧ, а мужиклы тшӧктіс места вылас сулавны. Кор ош локтіс мужик дінӧ, руч петіс пуяс сайысь да ыджыд гӧлӧсӧн горӧдіс:

— Эй, дядьӧ, сё кӧинӧс либӧ ошкӧс эн аддзыв? Кӧинъяс ошкӧс корсьӧны, кӧсйӧны сійӧс косявлыны.

Ош зэв ӧдйӧ дзебсис телега улӧ да шӧпкӧ мужиклы:

— Ой, другӧ, эн висьтав, сёйны тэнӧ ог кут.

— Эг аддзыв, ручанӧй, эг аддзыв, — вочавидзӧ мужик.

Руч серӧктіс да шуӧ:

— А эсійӧ нӧ телега улад мый куйлӧ?

А ош телега увсянь шӧпкӧ мужиклы:

— Висьтав, мый сэні конда краж куйлӧ: пес вылӧ дасьтӧма.

— Конда краж куйлӧ: пес вылӧ менам дасьтӧма, — вочавидзис мужик.

Руч бара серӧктіс да шуӧ:

— Конда краж кӧ нӧ, мыйла абу телега вылад пуктӧмыд да кӧрталӧмыд?

Та бӧрын руч бара котӧртіс пуяс сайӧ дай воши. Ош петіс телега улысь да тэрмӧдлӧ мужикӧс:

— Вай, другӧ, ӧдйӧджык пукты менӧ телега вылад да гезйӧн кӧртавлы.

Мужик пуктіс ошкӧс аслас телега вылӧ да крепыда сійӧс кӧртавліс гезъясӧн. А руч сэк бара петіс пуяс сайысь да юалӧ:

— Эй, дядьӧ, сё кӧинӧс либӧ ошкӧс эн аддзыв тэ? Кӧинъяс ошкӧс корсьӧны, кӧсйӧны сійӧс косявлыны.

— Эг аддзыв, — шуӧ мужик.

— А телега вылад тэнад мый куйлӧ?

— Конда краж, пес вылӧ. — шуӧ мужик.

— Конда краж кӧ, мыйла нӧ сэтчӧ чертӧ абу сатшкӧма?

А ош шӧпкӧ мужиклы: «Пукты чертӧ мыш вылӧ, сатшкы ме вылӧ».

Мужик кыдз сатшкис черсӧ ошлы мышкас, ош сэтчӧ и ӧкӧлейтіс.

Делӧ лои ставыс лючки-ладнӧ. Мужик мездысис ошкысь, ӧні колӧ ручкӧд рӧщӧт вӧчны. Руч шуӧ:

— Но, ме тэнӧ мезді ошкысь. Кыдзи кутан мынтысьны отсасьӧмысь?

— Ме, — шуӧ мужик. — тэныд кык сера чипан сета. Со найӧс мешӧк пиӧ кӧрталӧма. Сӧмын гортад вотӧдз мешӧксӧ эн разь.

Босьтіс руч чипан тыра мешӧк да кыскӧ гортас, быдсӧн упкакылӧ: мешӧкыс сэтшӧм сьӧкыд, мый кыскынысӧ ӧдва вермӧ.

— Ок, — шуӧ, — кутшӧм гырысь да госа чипанъяс пуктӧма менам мужикыд. Час жӧ, ӧти чипансӧ тані сёя, а мӧдсӧ гортӧдз нуа.

Разис руч мешӧк кӧвсӧ да видзӧдліс мешӧк пытшкӧ, а сэні вӧлӧм кык сера пон. Понъясыд тай кыдз уськӧдчисны ручлань да пондісны вӧтчыны сы бӧрся. Вӧтчӧны, увтчӧны — вот-вот кватитасны сійӧс. Руч мыръяс костті да кустъяс сайті, чикльӧдліс да кытшлӧдліс и ӧдва-ӧдва удитіс дзумгысьны аслас гуӧ.

Гуас куйлігӧн руч заводитӧ сёрнитны:

— Кокъясӧй, кокъясӧй, мый ті вӧчинныд?

— Ми тэнӧ котӧртӧдім да понъясысь мездім.

— Синъясӧй, синъясӧй, а ті мый вӧчинныд?

— Ми гӧгӧрбок видзӧдім да понъясысь мездім.

— Бӧжӧй, бӧжӧй, а тэ мый вӧчин?

— А ме пыр торкалі да мешайті тэныд котӧртнытӧ.

— А, сідзкӧ тэ он отсась, а мешайтчан меным. Ме тэнӧ понъяслы сета.

Руч скӧрмис аслас бӧж вылӧ да йӧткис сійӧс ортсӧ, гу розь дінӧ. Понъяс кватитісны сылысь бӧжсӧ, кыскисны ручӧс ортсӧ и бӧжсӧ и асьсӧ косявлісны.