НЫВЛӦН ДУМЪЯС


Мишлӧн керка — кӧрт вевтаса,
Югыд сапӧг — рӧмпӧштан.
Зэв эськӧ ме сыкӧд пара,
Эз кӧ юрын вӧв Иван.

Тӧдӧ сьӧлӧм — Ваньӧ бурджык,
Сыкӧд олӧм лоӧ шань.
Да ӧд Мишлӧн олӧм унджык —
Амбаръясас оз тӧр нянь.

Мишлӧн керка кыдзи карын,
Бать-мам сылӧн озыр йӧз.
Лавка тырӧма тӧварӧн,
Карта вылас сизим мӧс.

Миш дугдывтӧг юӧ вина:
Ме пӧ озыр, ме пӧ бур,
Менам олӧм пӧ зэв вына,
Ме кодь олӧм мӧд оз сюр.

Ваньлӧн озырлуныс — книга.
Батьыс колис олӧм лёк.
Муяс вылас кӧдзӧ вика —
Ваньыд олӧ нига ног.

Уна локтӧны сы дорӧ
Ас кодьыс жӧ гӧль йӧз пи.
Налы нига лыддьӧ горӧн:
Выль олӧмӧ петан ин.

Мыйла радейтны мем Мишӧс?!
Ваньлӧн юрас унджык бур, —
Овны кутчысяс зэв яра,
Миш моз оз шыбит видз-му.

Полӧ. Нывлӧн вӧй ӧд сьӧлӧм...
Кодкӧд ковмас овны нэм?
Вань ӧд, муса, комсомолын,
Мишлӧн зептас оз тӧр сьӧм.

Думъяс потісны кык пельӧ,
Киссисны — он курышт бӧр.
Шуны кыв ёна на полӧ:
Кодыс кыксьыс сьӧлӧмшӧр?

Нылыд регыд збыльтӧ кылӧ,
Ныв сьӧлӧм зон дінын — чвет...
Ваньлы пеляс кодкӧ сьылӧ:
— Ваньӧ, тэ медмуса мем.