НЫВБАБАЯС СЪЕЗД КЕЖЛӦ

Некод на эз вунӧд важъя оланног;

Ӧні на век уна сылӧн кольӧм ёг.

Кырныш чукӧр пычкис нужнӧй мортлысь вир;

Некод сэк эз аддзыв шойччӧг, шойччан дыр:

Уджысла эз бырлы некор пӧсь да быг;

Уджыс кӧть и сьӧкыд — кынӧм вӧлі тшыг.

Ставыс сійӧ сідзи вӧлі, муса ёрт.

Важ олӧмлысь лёксӧ тӧдліс нужнӧй морт.

Кодлы медся сьӧкыд овны вӧлі сэк?

Нывбабалӧн вӧлі медся лёкджык рӧк.

Коньӧръяс ми, аньяс, медся пемыд йӧз;

Лэчкын моз жӧ кутіс пемыдлунлӧн вез.

Некор ми эг тӧдлӧ гажа оланног;

Некор эз на бырлы сьӧлӧм вылысь шог.

Нывбаба эз вермыв шуны ӧтик кыв.

Олӧм-вылӧм йылысь — «оз судз сылӧн сыв!!!»

Нывбабалӧн вӧлі сӧмын ӧти мог:

Мужикыс, мый шуас, вӧчны век сы ног;

Кӧтшас джоджын жӧдзны — нэмӧвӧя «стаж».

Кага бӧрдӧм кывны вӧлі ӧти гаж.

Права сылӧн вӧлі — чӧвтны пернапас.

Да корсюрӧ (шоча) ӧдзӧс водзӧ тас.

Ӧні олӧм вежсис, лои дзикӧдз выль.

Гӧрд Октябрын письтіс олӧм пиысь мыль.

Ӧні век на киссьӧ сэтысь вир да ор.

Выль олӧмлӧн абу некӧн пом ни дор.

Озыр ӧні абу — ставыс «муса ёрт».

Олӧм выльӧс вӧчӧ выль ног олысь морт.

Нывбабалы петіс ӧткодь оланног;

Сьӧлӧм вылысь быри, косьмис курыд шог.

Нывбаба тшӧтш аддзис олӧм пиысь гаж.

Права ӧткодь лои — олӧм абу важ!

Олӧм выльӧс вӧчны сувтам ставным тшӧтш,

Съездъяс вылын лыддям мужикъяслы реч.

Ёна важӧн мудзліс миян ки да кок.

Ӧні карӧ мунам, Сыктывкарӧ, лок!

Нывбабалысь восьтам обласьтувса съезд.

Важ олӧмлы пуктам нэм чӧж кежлӧ крест.

Олӧм пиысь мыськам важлысь лӧп да ёг.

Нывбабаяс кӧть да! Кодлы кутшӧм мог.