НИМЛУН СЁЙИМ

Ог нин помнит, кутшӧм классын ми сэки велӧдчим... Менам пӧдругалӧн воис чужан лун. Корис миянӧс — куим пӧдругаӧс — нимлун сёйны. Быдӧн ми пасйылім чужан луннымӧс. Мам-батьным пулісны кисель, рок, пузьӧдлісны самӧвар, пӧжасьлісны и гӧститӧдлісны корӧм челядьӧс.

Сідзи жӧ кӧсйис вӧчны и менам пӧдругаӧй. Ми, корӧм челядь, зэв долыда мунім нимлун сёйны. Пырим керкаас, а гозъя ӧбедайтӧны. Пуксим порог дор лабичас, виччысям, кор корасны пызан сайӧ.

А пӧдругалӧн мам-батьыс топыдіник йӧз вӧліны, горшиникӧсь на дай.

Сёйисны гозъя яя шыд, проса рок, шлупйисны-панялісны тасьті кисель. Ырскисны сакара чай и, кор кутіс нин горзьӧдлыны, батьыс мурӧстіс:

— Сэсся нинӧм сёйны-юны абу...

Гортын мамӧ юаліс, мыйӧн нӧ пӧ гӧститӧдісны. Быдсяматорнас, мися. И ужынӧдз эг лысьт сёйыштны, кӧть эськӧ и кынӧмӧй гуръяліс-сюмаліс.