НЭМЪЯС ВИДЗА ОЛӦЙ!


Менам велӧдысьяслы
1

Мӧдлапӧлын
Гажа вӧлі
Страдна дыр.
Гожӧм коли,
Ӧні ольын
Зорӧд тыр.
Коса-куран
Шойччӧ, турун
Веж да кос.
Челядь шыӧн,
Сера гыӧн
Ю оз ворс.
Ваыс — кӧзӧд,
Пемыдлӧз нин
Сылӧн вӧнь.
Муяс вылӧ,
Видзьяс вылӧ
Пуксис лӧнь.
Школа дорын
Сӧмын гора,
Гажа тан.
Сійӧ сетӧ
Туйӧ петны
Вежӧр, сям.
Сэсся вояс,
Коді доя,
Коді бур,
Кежласясны,
Вежласясны,
Дзормас юр.
Челядьдырӧ,
Сё майбырӧ,
Он нин мун.
Сэтчӧ вермӧ
И оз йӧрмы
Ӧтнас дум.

2

Сӧмын паметяд мортлӧн
Оз на ставыс и коль.
Кольӧ ас чужан гортыд,
Кӧні медсӧстӧм ёль.
Ставсӧ прӧститысь мамыд,
Льӧмъя-пелыся йӧр.
Ю, код визувтӧ рама,
Тӧдса ордыма вӧр.
Воймӧм керъяса школа,
Кӧні зильгӧ звӧнок.
Кытчӧ долыда волін,
Ӧні важӧн нин он.

3

Арыс дыр на жӧдзас,
Сэсся воас кӧдзыд.
Сійӧ вежас тулыс,
Шоныд сетас мулы.
Гожӧм локтас вежӧн,
Бара арлы кежас.
Олӧмыс оз помась,
Выль йӧз чужӧ помысь.
Визув челядь котыр,
Велӧдысьяс, копыр.
Тэн тшӧтш, муса школа,
Нэмъяс видза олӧй!