МЫЙ КОЛӦ МЕМ?!


Мый бара колӧ мем?! — Мый?!
Сымда тай колӧмыс сьӧлӧмын менам,
		мый ачым ог тӧд.
Ок, уна мен колӧ, вывті тай уна!
Векньыд зэв кажитчӧ вынӧйлы туй,
Мый пикысла нымӧн ог пӧд.
Сэтшӧм мем шог овлӧ,
Мый мукӧддыр
Пытшкӧсса кылӧмӧн
Дзик сьӧлӧмӧй колӧмла потлӧ,
Юр вемӧй ӧзйӧ — думъясӧн тыр!
	Мый нӧ мем колӧ сідз, мый?!
	— Ставыс дзик! Быдтор,
	Мый му вылас эм!
Кӧсъя ме тӧдны йӧз тӧдтӧмторсӧ
	Енъюгыд пасьтасьыс!
Лолӧс мыйкӧвыв пуктыны!
Уджавны-керны, жуглыны-пасьйыны, вӧчны!
	Гажӧдны, бӧрдӧдны, сьывны…
Лэбавны енэжті шондіӧдз, усьлыны пыдӧсӧдз —
Пемыд няйт гуранас дзурсмунлыны…
Кыптывны став вылас, сӧстӧмӧн няйт письыс петны…
________

Нӧшта на сы кындзи кӧсъя —
Радейтны мусӧн,
Юр вежӧр воштывмӧн, вунӧдчӧм выйӧдз…
________

Став олан гажлуннас, став шогъяснас
Овны ме кӧсъя на вӧлі,
Мед эськӧ быд сійыв эбӧснам
Олӧмсӧ тіралі-кылі!