МИЯН ПЕМӦСЪЯС

Гортса пемӧсъястӧ ми видзлім уна пӧлӧсӧс: мӧстӧ и порсьтӧ, ыжъястӧ и каньтӧ. Весиг вӧралан пон видзлім, кӧть и мужик мортыс, кыйсьысьыс, керка помын эз вӧв. Эгӧ и эмбур видзӧм ради сійӧс видзӧй. Киссьӧм пывсян да пӧлӧс керка вылад некодлӧн вежыс оз пет. Пӧчӧлӧн пӧдругаясыс миянӧ пырнысӧ нин вӧлі полӧны. Ӧдзӧсным мышканыс клопкас, да пӧлӧс джоджӧдыд гӧстяыд пачводз дорӧдз тутӧ вӧлі.

Мамӧ асьсӧ лыддис шудтӧм киаӧн, а меным вӧлі кажитчӧ мӧдарӧ. Мӧсным миян вӧлі медся мича. Карса барышняӧн ыдждӧдлывліс сійӧс мамӧ. Смоль сьӧд лӧсталан гӧна. Сӧмын плешкас еджыд кодзув дзирдаліс. А мамӧ век броткис сы вылӧ, йӧв пӧ этша сетӧ, век сулалӧ. Йӧзыс вый вӧчан заводӧ пӧ деньга вылӧ йӧвсӧ сдайтӧны, а миянлы пӧ мӧска вывті бокысь йӧв ньӧбны лоӧ.

Ыжъястӧ ме ёна эг радейтлы, зэв нин кывзысьтӧмӧсь найӧ вӧліны. Шыригас кутнысӧ найӧс зэв дӧсаднӧ. Люкасьӧны да пессьӧны ёна. А вот баляпияныс мичаӧсь да мусаӧсь вӧліны. Ӧтчыд рытывбыд бӧрді, мамӧ ас дорӧ крӧвать вылӧ водтӧдны эз лэдз да.

А каньыд керкаын асьсӧ збыль кыліс кӧзяинӧн. Тузиклысь эз этшаысь нырсӧ парсавлы. Абу пӧ тэныд местаыс керкаын, пет пӧ жытник дорӧ, пон рӧд. Пӧрысьӧ-нэмӧсӧ сэсся тай лӧсявны жӧ мӧдісны.

Пемӧсъяснад жӧ крестьянскӧй керкаыд гажа-а. Ӧні вола гортӧ, да гажтӧм босьтлӧ. Нинӧмӧн оз торъяв чужан керкаӧй менам карса жырйысь. А ме эськӧ кӧсйи торъялӧмсӧ...