МАМӦЛЫ ДА ЧОЙЛЫ

Войков кежлӧ волас чой
Няйт, сьӧд лымъя дука карас.
Гажтӧмысла оз и сёй:
Кыдз пӧ тані олад бара?..

Эз кӧ эськӧ вӧв пӧ быть,
Петі ӧмӧй, туйӧ мӧді?
Пакталӧ тан лов и выть,
Час-мӧд ветлӧдла и пӧда.

А ме ола тан кызь во,
Енма-муа костас ола.
Карса мортӧн эг и ло.
Сиктӧ гӧстя пыдди вола.

Тан ог ков, ни сэн ог ков.
Шуасны жӧ: «Ыджыд сяма...»
Абу жаль, кӧть петас лов,
Мудзи олӧмсьыс ме, мамӧ...

Ӧшинь сайын кусӧ лун.
Регыд пуксяс войся пемыд.
Мамӧ, олышт на, эн мун,
Мед кӧ помасьӧ нин нэмыд.

Сэтчӧ некор абу сёр.
Сэсь жӧ некод на эз волы.
Дыр-ӧ ачым ме ог ор?..
Ме ӧд сӧмын тэныд кола.

Таво менам — «понлӧн» во.
Сӧмын некодӧс эг пурлы.
Но и домйывса эг ло.
Вӧля вылас быдтор сюрлі.

Чужъясны, да нювлі бок.
Дойсӧ сьӧлӧм бердын видзи.
Йӧзӧ корысьӧн эг лок.
Гусьӧн чашнитны эг видзӧд.

Гашкӧ, этша сеті бур?..
Уна лёктор аслым вӧчи.
Шоныд сійӧн и эз сюр.
Унджыкысьсӧ вӧлі кӧдзыд.

Шыбӧльясас усьлі кор,
Йӧзлысь кыпӧдӧм эг виччысь.
Вӧвсӧ ышмӧмысь эг ёр.
Сідзи тырмис ёрччысь-видчысь.

Пыр на кыдзкӧ видзліс Ен.
Ӧні чойӧй вӧсна пола.
Медводз эськӧ мунны мен,
А ме вужъясьӧма, ола.

Тан ог ков, ни сэн ог ков.
Скӧрмывла и лола рамӧн.
Кыдз нӧ му вылас он ов,
Гортын виччысьӧ кӧ мамӧ.