ЛОВЪЯ ЮРӦН — МӦДАР ЮГЫДӦ
Тайӧ дивӧыс вӧлі зэв нин важӧн. Ме сэки вӧлі том на. И радейтчи тай со. Унмӧй воши. Лун и вой сы йылысь думайта, кыдзи эськӧ сійӧс семьясьыс торйӧдны да пышйӧдны. А сылы пӧсь ни кӧдзыд.
Ӧти вой бара эг унмовсьлы. И юрӧ воис ӧти зэв «тӧлка» мӧвп. А кула кӧ, мися, кӧть шогӧ усьлас оз? А збыльысь кӧ нӧ кула, кыдзи ме кута тӧдны? И ме кыв кӧрталі: кувлыны ловйӧн, паськӧдны юӧр аслам кулӧм йылысь.
Лёк юӧрыдлӧн кокыс кузь, ӧдйӧ паськалӧ.
Сентябрнад ӧкмыс час рытын пемыд нин. Ог весиг биась, керка ӧдзӧс игантӧм (кулӧмаыд ӧд оз чеччы да восьт). Чайта, воис нин юӧрыс муса мортӧдз. Дерт, сійӧ медводз воас да кутас бӧрдны кыз синваӧн.
Некод оз лок, вугрӧдлыны нин кутіс. Пӧшти вӧлі узя, грыма-йирка кодъяскӧ пырисны керкаӧ. Ӧзтісны би. Син ог восьт. Кыла, ӧти гӧлӧсыс чойлӧн, а мӧдыс — шопер Митрейлӧн. Кузь автобуснас сылы сӧмын поконикъясӧс и кыскавны.
Зэв зіля пукси крӧвать вылӧ. Воысьяс чур-чермунлісны, но сэсся сайкалісны да тшӧктісны пасьтасьны. Ветлам пӧ сиктад, керка тыр пӧ йӧз виччысьӧны. Мыйла, мися? А тэнӧ пӧ дзебны-гуавны. Со кытчӧ юӧрыд медводз лыйыштӧма.
Воим сиктӧ вой шӧр гӧгӧр. Миян керка ӧшиньясын сярвидзис на югыд би. Ӧшинь увті кайигӧн горӧді сьывны: «Ме гуляйті лун да вой...» Мед, мися, мамӧ оз повзьы, тӧдас, мый ме ловъя на.
Пызан сайын пукалісны нин сӧмын некымын морт, мамӧӧс гажӧдысьяс, полан ӧд тай кулӧм мортсьыд. Мукӧдыс муналӧмаӧсь шойччыны, медым водз чеччыны да пусьыны-пӧжасьны, поконча Сандраӧс колльӧдны.
Мӧд лун асывнас мамӧй водз жӧ чеччис, няньыд ӧд уна кӧтӧма, пражитан-жаритчан уна лӧсьӧдӧма. Аслым и унджык пусян-пӧжасян уджыс сюрис.
Сэсся воалісны матысса и ылысса рӧдня-вӧдня. Эз жӧ тай шогӧ усьны, мый ме ловъя. А Иван вок менӧ ӧшинь дорысь аддзис да град бӧрӧздаӧ гатшӧн чергысис, зырйыс тутіс пывсян дорӧдз. Но и бур, нинӧмла ловъя мортлы гу кодйыны.
Куим сутки гажӧдчим-гуляйтім. Татшӧм бурасӧ менӧ некор на эз гӧститӧдлыны: пӧтка яй да свежӧй чери, мырпом и ельдӧг, чӧскыд пирог-шаньга. Вина киссис шорӧн.
А мунігӧн юасьны кутісны: волан он пӧ 9 да 40 лунтӧ пасйыны-казьтыштны. Вола, мися, тадзи жӧ кӧ шаньӧсь да бурӧсь лоанныд.
Муса мортлӧн жӧ весиг синва войт абу петӧма. Колӧ пӧ эськӧ «Югыд туйӧ» сетны шогсян юӧрсӧ, да деньгаыс жаль лоӧма.
