ЛЬӦМ ПУ ВУЖ
Чойлы вӧлӧма арӧс. Меным тӧлысь на абу тырӧма. Дерт, сійӧс ог нин бура помнит, но самӧй сэки пӧльӧ ӧшинь улӧ вайӧмаӧсь кык нэриник пу; чойлы — пелысь, меным — льӧм. «Челядьлы на моз вужъясьны, на моз йывмыны, налысь нэмсӧ овны, пуяслы челядьлысь шуд видзны».
Сідз вочасӧн и быдмисны пелыся-льӧмъя миянкӧд тшӧтш. Пелысьыс, дерт, дзоляджык, а льӧмйыс пӧльлӧн керка сигӧрысь вылӧджык кыптіс. Разӧдчисны пӧльлӧн челядь, менам дядьяс-объяс. Куліс пӧчӧ. Колис пӧльӧ ӧтнас. Ачыс ыджыд. Ачыс Ен и Омӧль. Ачыс месай и месань. Керка юр кутысь. Керка подув видзысь. Но ӧтнас.
Пӧрысьмис. Пӧрысьладорыс шашаритчыны кутіс олӧм шӧртас. Дугдіс котшыс куритчанӧн тшынасьны. Курыд зелля юӧмысь эновтчис. (Водзын ведра пӧлӧн лун юӧ вӧлі, кутіс дозйӧн-джынйӧн юны.) Ёрччӧм-матькӧм чинтіс. (Некод вылӧ лои.) Воймӧм бӧрас гӧгӧрвоис: олӧм овсьӧма, кӧть кураснас чӧсмасьны колӧ удитӧдчыны.
Сэк, тыдалӧ, и льӧмйысь родӧмыс чужис. Элясьны кутіс: «Льӧмйыс лунъюгыдсӧ сайӧдӧ. Вужъясыс керка бердӧдз воӧмаӧсь. Керка подулын кык ньӧр пидзӧс выя быдмӧма. Керавны лоӧ коркӧ». «Мый нӧ, пуыс мустӧ зыртӧ? Мед быдмас. Челядь оз-оз да и кокасьыштасны»,— шулісны сылы менам бать-мам. «Керкаӧй кушмис. Пу вужйыд кӧ пӧ тай керка улӧдзыд воас, олысьыс бырӧ. Керала коркӧ».
Кӧть приметаясӧ ёна эг эскывлы, татшӧм сёрнисьыс сьӧлӧм век жӧ ыркмунліс. Кыдз нӧ сідз? Менсьым льӧмйӧс? Менам пулысь вужъяссӧ?! А ме вылӧ кӧ вуджас? Некымынысь весиг ачым пӧльӧс босьтчывлі ӧлӧдны: «Йӧзыд быд нинӧм абусӧ сӧрӧны да, ставсӧ кӧ кывзыны... Ӧшиньӧдзыд чеччыштӧмӧн он судз. Югыд и шоныд веськалӧ». — «Коркӧ сёровно керала. Леторосыс мудӧд увті нін мыччасьӧ».
Эз керав. Кушмис пӧльӧлӧн керкаыс. Ёнӧн-бурӧн тыртӧммис. Дерт, эськӧ, арлыдӧн нин пӧльӧ муніс. Эз дас кӧкъямысӧн, кӧкъямысдас кӧкъямысӧн. Но быттьӧ мыжа сы водзын: менам пуӧй ӧд керка подувсӧ лэптіс, олан русӧ ортсӧ лэдзис.
Ӧти петан туй эськӧ вӧлі жӧ: ылӧджык пусӧ керкасяньыс вужйӧдны... Но сэк ӧд пӧльӧ ачыс на зумыд вӧлі. Вина юис ведра пӧлӧн. Табак шпуткис «Моршанскӧй». Быд праздник мужикъяскӧд шердйысис. Некор вӧлі кок улас синсӧ чӧвтлыны. Некор вӧлі потшӧса-керкаа костсӧ синмавны.
Водзджык кӧ гӧгӧрвоис, гашкӧ, и тыртіс на ӧкмысдассӧ.
