ЛЕНИН ГУ ДОРЫН Кольӧм во, Ӧкмысӧд арӧ,Волі ме Мӧскуа карӧ...Волывлі и Октябрӧдз татчӧ,Но кутшӧма вежсьӧмыс тӧдчӧ! Мӧскуа — сьӧлӧмыс СССР-лӧн.Кремль нӧрыс — Мӧскуа карлӧн.Ленин гу — став му сяр выв уджалысь йӧзлӧн.Мӧскуа. Гӧрд площадь выв. Рыт. Лэччис нин енэжса шонді. Миллён шондіӧн ыпнитіс-ӧзйис сы пыдди кар... Гӧрд площадь — рӧм, Кремль нӧрыс — лӧнь: кывзысьӧ-сулалӧ, кыдзикӧн гымалӧ, муркӧдӧ кылӧ миллёна кар...........................Кремль-крепӧсьт шуштӧма дӧввидзӧ, нитшсялӧм из-кирпич стенъяснас сьӧкыда базвидзӧ... Сулалӧ-видзӧ, сюрс вося олӧмъяс чукрасьӧм кымӧсас кутӧ... Видзӧдны, быттьӧкӧ — ставыс на важ, абу на некутшӧм выль олӧм гаж: быдлаын вичкояс, чурвидзӧ крестъяс, тоньвидзӧ-ӧшалӧ сё пудъя жыннянъяс... — Мед! Миянӧс оз нин вермыны найӧ бергӧдны важӧ. Сӧмын нӧ ёнджыка казьтывлӧ-петкӧдлӧ важ мирлысь пежсӧ!.. Тонӧ, со, саръяслӧн рель — морт юръяс кераланін (вирӧсь на пос помныс налӧн). Ӧнісӧ сэтысянь юӧръяс сетӧны — кедзовтӧм войтырлы мир! Аддза, кыдз сувтлывліс этійӧ пос вылас медбӧръя здукъясас Разин... Сӧмын тай, мужикӧй, сё вояс бӧрын джаггӧрӧд гӧрӧдсӧ Октябрын сьылісьыд разин!..........................Со, тонӧ, бара — сулалӧ шӧрас памятник важ: чургӧдӧ кияссӧ Минин, быттьӧкӧ йӧзыслы гу вылӧ индӧ: кӧть пӧ и ми вокыс танӧсь на ӧні, но абу пӧ ми нин, со пӧ код — Ленин!............................Гӧрд площадь пасьтала йӧз. Зэв ыджыд кытшыльӧн гартчыштӧ-люзьвидзӧ ӧчередь-бӧж, быттьӧкӧ кыскыссьӧ сюрс сывъя гез... Гӧрд площадь лӧнь, — дас сюрс морт виччысьӧ, сулалӧ чӧв. Кытысьсӧ абуӧсь! — Быдлаысь, му сяр выв пасьтасьыс: Азия, Африка, Европа гӧгӧрысь, ыліысь — мореяс сайысь локтӧмны- кыссьӧмны татчӧ. Коді нӧ тані тіянлы рӧдняыс?.. — Сійӧ тай, код кузя аддзинныд мортъясӧн асьтӧ! Коді тай олӧмсӧ му сяр выв йӧзыслысь мӧдарӧ бергӧдіс. Тадзикӧн семья ыджыд ай гу вылӧ казьтывлӧ-волӧ. Сідзи жӧ ӧні быд лунӧ-часӧ волысьлӧ татчӧ. Но семьяыс налӧн му шар выв пасьтаса Интер- нацио- нал!..........................«Тринь... тринь... тринь... брень!» — Кремль башня йывсянь троньӧдіс-кучкаліс кӧкъямыс час. Зымӧбтіс, горӧдіс ворсны музыка «Интер- национал». Чукӧстчис сьӧлӧмас быдӧнлы: «Ӧтувтчӧй, уджалысь быд нация йӧз!» Ырӧстіс, — бӧрддзыны кӧсйис синваӧн морӧсын сьӧлӧм, — визлаліс сӧнъясӧд, чепӧсйис чужӧмӧ, — войтыштны эз лысьт: (Ленинлӧн кывъясыс тӧд вылӧ усис) сьӧлӧмсянь юр вемӧ кайис, син водз эз гудырт, сӧдз вежӧр пуктіс, — разалі тушаӧ, ёнтіс...........................Ньӧжйӧник, воськолысь воськолӧ мӧдӧдчис гу дорлань визувтны йӧз. Лӧньыштлам... — Куйлӧ тан миян медыджыд ёртным!..........................Вой. ВЦИК керка юрйылын, зэв вылӧ качӧдчӧм, гӧрд-дӧла биӧн ӧзъялӧ-шпарӧдчӧ гырд рӧма плаг! Кыпӧдӧ-кыскӧ бӧрсяньыс тушатӧ, кытчӧкӧ зэв ылӧ ыстӧ!.. Кар весьтын сынӧдыс ломтысьӧ биӧн, кыдзи тай вӧр тыла сотігӧн сюръяӧн енэжас югӧрыс довкъялӧ — ветлӧдлӧ-жӧдзӧ.............................Лӧнялӧ? — О-оз! Вежсялӧ шыясыс вой кежлӧ. Кремль нӧрыс, быттьӧкӧ зэв ыджыд рупор, чукӧртӧ гӧгӧрсьыс шыяссӧ ставсӧ. Луннассӧ Мӧскуа кар — быттьӧкӧ зэв ыджыд кодзувкоткар. Войнассӧ — зарада электрическӧй сяр. — Лыйлӧны-сявкйӧны радиостанция башняяс — сетӧдлӧ-ёнтӧдлӧ гӧгӧрыс сынӧдас, ысталӧ-разӧдӧ юӧръяс, сёрнияс: рытылӧ, лунвылӧ, асылӧ, войӧ — став Союз пасьтала... Миллён йӧз кывзалӧ сиктъясын, грездъясын, рытъясын олӧ, — тіпиктӧ-ёпкӧ сьӧлӧмнас, быдлаӧ волӧ.............................Кузь войбыд асылӧдз дугдывтӧг буксісны-сьылісны паровоз буксанъяс «у-уук!..» Чуксасисны ӧтмӧда-мӧдныскӧд: «эн у-уузь!»..........................Кыптӧ нин шонді, быттьӧ вир ёкмыль гӧ-ӧ-ӧрд... сьӧд тшынӧн шпуритан пабрик трубаяс пӧвстті...........................Садьмӧмась, кылӧ, кӧрт борда пӧткаяс: «жжррр» — зэв вылын енэжас борд шыныс кылӧ, кыпӧдчӧны аэро- планъяс... Пуксьӧ лун...........................Сідзикӧн вежласьӧ — оз лӧньлы, узьлы, лун и вой уджалӧ мудзлывтӧм сьӧлӧмыс Эс Эс Эс Эр-лӧн, кытӧні куйлӧ нуӧдысь ёртныс уджалысь йӧзлӧн.
