ЛЕЛЬКУЙТЛІМ НЫЛӦС МОЗ

(Сиктса трактористлӧн шогалӧм)


«Тувсов лун — во вердӧ», —
Шулӧма крестьянин, —
«Кӧдза кӧ он эндӧд —
Во чӧж олан няньӧн».

Сы вӧсна и ньылӧм
Кисьтлім эгӧ скупа,
Лелькуйтлім кыдз нылӧс —
Муӧс, мед эз дубав.

Асъя кыа петӧ —
Ми нин муяс шӧрын.
Пажын сьӧрысь ветлӧ —
Улльӧв да нянь шӧрӧм.

Рытъя шонді бердас —
Шабашитам вӧлись.
Дзоридзьяса эрдас
Шойччылім бур пӧтысь.

Шудӧн тырліс сьӧлӧм,
Восьласным кӧть дыгыд.
Вылын ситеч дӧрӧм
Соласьӧма, быгыд.

Локны гортад любӧ,
Виччысьӧны тані
Гӧтыръясным: Люба,
Вера либӧ Анна.

Дзигӧдасны голи
Шег кодь посни челядь:
Быдӧн мыйкӧ дольӧ,
Вашкӧдӧ нин пеляд.

Пӧсь тшай юны эштам
Сьылысь самӧварысь.
Мӧвпавлін ас кежын:
Кутшӧм лоӧ арыс?

Рудзӧг пызя шаньга,
Майбыр, эз вӧв кыдъя.
Кыпыда и шаня
Уджын зілис быдӧн.

Муыс быттьӧ сетіс
Миянлы ён чужва:
Кыдзи-й тувсов петас —
Вӧвлім пыді вужъя.

Та вӧсна и вынным
Морӧс чукйӧн пуис.
Лунысь лунӧ шудным
Ытва моз жӧ туис.

...Олӧм дзугсьӧм бӧрын
Ставӧн воим пикӧ.
Меным кӧ он эскӧй —
Волӧй миян сиктӧ!