ЛАПЪЯ ПЕЛЯ ВАТКЫЛЬ


Завор дорын чомтор эм.
Сэні колльӧ ассьыс нэм
Катшыс нима пон.
Сылӧн быдмӧ зон —
Лапъя пеля Ваткыль,
Ветлӧ муткыль-маткыль.
Кор оз нёнясь, увтчӧ пыр —
Чомсянь чургӧдӧма ныр:
Тяв-тяв-тяв!
Тяв-тяв-тяв!
Сылӧн мамыс сюсь,
Лун ни вой оз узь:
Видзӧ керка, видзӧ йӧр,
Шышъяс вылӧ ёна скӧр:
Ув-ув-ув!
Ув-ув-ув!
Талун водз зэв садьмис Ваткыль,
Петіс чомйысь муткыль-маткыль,
Ӧшинь улысь сійӧ
Аддзис чипанпиян,
На вылӧ уськӧдчис збоя:
Вот пӧ ставнытӧ и сёя!
Курӧг аддзис кычипиӧс,
Кот-кот-кот! — горӧдіс сійӧ,
Понлы нырнас юрас сатш!
Ваткыль тайкӧ оз усь гатш.
Варгыльтіс мам дінас сюся
(Позйын мамыс вӧлі узьӧ),
Кыз синваӧн бӧрдӧ-лявзӧ,
Мамыслы висьталіс ставсӧ.
— «Быдмышт этша, — шуӧ мамыс, —
Абу на кыйсьыныд сямыд!»
Ваткыль миян збой,
Кыйсьӧ лун и вой!
Чомйысь петіс бара
Миян Ваткыль яра.
Локтӧ уска кань
Весьтас Ваткыльлань.
Тапик-тапик небыд кок.
«Лок жӧ татчӧ, лок! —
Ваткыль сылы горзӧ, —
Тэкӧд вай ми ворсам!»
Каньлы паныд мунӧ...
Регыд ворсӧм вуні...
Лэчыд гыжъя каньыд
Нырас швачкис шаня:
Ӧтарас дай мӧдарас
Вӧчис кычаныдлы пас.
Сюръя йылӧ ачыс
Мач моз тривк-тривк качис.
Ваткыль лӧвтӧ, лявзӧ,
Ёрӧ гӧгӧр ставсӧ!
Воис мамыс дорӧ,
Чомйӧ пырис нора.
Мамыс шуӧ: «Гортын пук!
Каньыд тэныд абу друг!»
Ваткыль миян збой.
Бурдіс сылӧн дой.
Ӧшинь улӧ бара петіс.
Ичӧт нывка мунӧ сэті,
Ваткыль тявзӧ-мурзӧ,
Пыркӧдӧ скӧр юрсӧ.
Сэсся нывлысь коксӧ... ва-а-з!
Платтьӧсӧ руз-раз.
Ичӧт нывка повзис,
Палич босьтны ковзис,
Юрас понлы торс:
«Тэкӧд ме ог ворс!»
Ваткыль лявзӧ-горзӧ —
Кутшӧм нин сэн ворсӧм!
Локтіс мамыс дорӧ,
Вӧльнӧй светсӧ ёрӧ.
Пельӧд нетшыштіс сэк мамыс:
«Этша, йӧюк, сямыд!
Пукав тан, эн йӧйтав,
Кытӧні пыр шӧйтан?!»
Ваткыль миян ён,
Сійӧ удал зон.
Кильчӧ помысь аддзис шыр...
Шырыд пышйис пырысь-пыр.
Майӧг йылын рака сьылӧ.
Ваткыль ув-ув рака вылӧ —
Рака лэбзис ылі муӧ.
«Повзин, небось!» — Ваткыль шуӧ.
Радла Ваткыль тявзӧ:
Ме пӧ медъён ставсьыс!
Некод Ваткыльӧс оз ышӧд —
Ачыс вексӧ пырӧ тышӧ:
Ыджыд сьӧлӧмыс зэв збой,
Кычи ён зэв, ой-ой-ой!
Курӧгыд да каньыд
Вывті нин зэв ваньӧсь.
Найӧс пурны меным дыш —
Весьсӧ нальны пинь да гыж.
Ёнджык пемӧсъяскӧд кӧсъя
Косьӧ петны... сьӧлӧм ӧзйӧ.
Ваткыль миян зіль:
Синсӧ оз дыр тіль.
Ваткыль миян ён —
Сійӧ удал зон.
Со тай вӧв мунӧ туй шӧрӧд.
Уськӧдчис Ваткыльыд скӧра...
Вӧлыд повзис — кырссис скач.
Пышйис кӧм ни гач!
«Видзӧдлӧй жӧ волӧй —
Меысь со кутшӧма полӧ!»
Ваткыль миян сюсь:
Син сылӧн оз узь!
Трактор аддзис миян кычи,
Чуймис... трачкакылӧ кыдзи!
«Часлы, сійӧс пура!
Дыр-ӧ сэтӧн дурас!»
Трактор сыысь пышйис —
Повзис Ваткыль гыжйысь!
Со ӧд кутшӧм ён
Миян Ваткыль зон!
«Ог кут овны чӧв.
Меысь пышйӧ вӧв.
Ыджыд трактор йӧрын
Меысь весьӧпӧри!
Меысь полӧ кравзысь рака,
Меысь пышйӧ тэрыб шыр.
Ноко ветла вӧрӧ-ягӧ,
Гортын олі вель нин дыр.
Часлы, вӧрӧ муна,
Сэні зверыд уна.
Накӧд пана чорыд тыш,
Ассьым лэчта пинь да гыж».
Мунас вӧрӧ. Сэні кӧч
Локтӧ Ваткыльланьӧ стӧч.
Ваткыль уськӧдчис зэв збоя:
«Ӧні тэнӧ ме и сёя!»
Кӧчыд понлы чужъяс нырас,
Ачыс пыдӧ вӧрӧ пырас.
Понлӧн нырсьыс петӧ вир,
Да и доймӧ сьылідзир.
Ваткыль миян яр,
Сійӧ абу няр.
Коз пу вылын ворсӧ ур,
Муртса тыдалыштӧ юр.
«Ноко, лэччыв муӧ! —
Ваткыль сылы шуӧ, —
Тэныд петкӧдла ме гаж,
Сёя, вазӧда гидж-гадж!»
Урыд дӧзмас: плешас понлы
Колльӧн лыяс... буретш инмас
Ваткыльыдлы синмас.
Кычан бӧрдӧ-лявзӧ,
Вӧр пасьтаыс равзӧ.
Ваткыль миян ён,
Сійӧ удал зон.
Ваткыль миян бур,
Кыйӧ-вийӧ ур.
Водзӧ мунӧ. Вужля бердын
Ош туплясьӧ быттьӧ шердын.
«Чеччы, ошкӧй! Тэкӧд позьӧ
Петны меным косьӧ?!»
Ошкыд ваксьӧ, тешкодь сылы:
Со пӧ косьӧ петысь кылӧ!
Ваткыль скӧрмис, шуӧ: «Начка!»
Сэсся ошлы гӧрбас вачкас.
Сьӧмдас серамысла ошкыд,
Туплясьӧ да пошкӧ.
Кычи чайтӧ — ошкыд кулі:
«Ошсьыд ён ме! — важӧн шулі».
Ваткыль миян ён,
Сійӧ удал зон.
Ваткыль миян чож —
Сыысь полӧ ош!
Ваткыльлӧн эз бурмы сьӧлӧм:
Ошкысь ёнджык звер на вӧлӧм.
«Меным колӧ лев,
Ой, окота зэв
Сыкӧд панны тыш,
Видлыны лев гыж!»
Левыд некытысь эз сюр,
Левлӧн ловъя коли юр!
Лун-лун корсис бегемотӧс —
Таляліс став тшак и вотӧс,
Тигрӧс кыйӧдіс кузь вой.
Зіль жӧ кыйсьысь, ой-ой-ой!..
Некод дзик эз югды.
Корсьысьӧмысь дугдіс,
Аддзис кӧинлысь кор бугыль.
Повзис Ваткыль, лои жугыль,
Гортас тӧвзис скач —
Быттьӧ чужйӧм мач.
Ваткыль ставсьыс ён,
Сійӧ удал зон.
Кыпыд сылӧн лов —
Некодысь оз пов!
Мамыс дінӧ муткыль-маткыль
Пырис лапъя пеля Ваткыль.
Нырыс гырд, а пеляс вир,
Бӧжас лемасьӧма сир,
Ӧти синмыс куньса,
Коксьыс воштӧма водз чуньсӧ.
Ошйысьӧ мамыслы сійӧ:
Ме пӧ дас лев вии,
Да и тигрӧс пури,
Кодыр паныд сюри,
Слӧнлысь курччи коксӧ,
Бегемотлысь — боксӧ.
Пельӧдыс някыртіс мамыс:
«Этша на, пиукӧй, сямыд,
Кытӧнкӧ пыр шӧйтан,
Пукав тан, эн йӧйтав!»