КУЖЫСЬ КИЯС


Быдмӧ Ваня ӧтка пиӧн,
Ӧтка пиӧн, кужтӧм киӧн.
Сылӧн радейтана пӧчӧ
Гортын ставсӧ ачыс вӧчӧ.

Весиг паськӧм пӧчыс сетӧ,
Гуляйтны кӧ Ваня петӧ.
Няйтӧн локтас — абу шог.
Мыськас пӧчӧ гӧгӧрбок.

Ӧтчыд йӧзсянь Ваня кылӧ —
Чуньнас индӧны сы вылӧ —
Со пӧ быдмӧ ӧтка пиӧн,
Ӧтка пиӧн, кужтӧм киӧн.

Чушис тайӧ ичӧт зонлы —
Вӧчис чомтор Буско понлы,
Пыртіс ва да карта сайысь
Гортӧ моздор пес на вайис.

Сэсся петіс ывла вылӧ,
Бара сёрни сэні кылӧ:
Кӧть пӧ-й ӧтка тайӧ пиыс,
Пӧчыс кодь жӧ кужысь киыс.