КУСЛЫТӦМ КОДЗУВ

«Локті тэныд шуны «чолӧм»,
Висьтавны, мый асъядорсӧ
Шонді югӧръяснас олӧ
Важӧн, коръяс вылын ворсӧ...
Висьтавны, мый кыдз и тӧрыт,
Ыджыд кӧсйӧмӧн ме тыр на,
И мый муслун, кыдз и вӧлі,
ӧзйӧ сьӧлӧмын, эз быр на...»
А. Фет.

І

Вежсьӧ баныс чужан мулӧн...
Бара тэтӧг сьӧлӧм кулӧ.
Кыдз нӧ ӧзтан сійӧс гажӧн,
Кор эг аддзыв тэнӧ важӧн.

Кынӧм пӧт кӧть, керка шоныд,
Оз тай долыд мӧвпъяс воны.
Шуд мӧй ньӧбан деньга вылӧ,
Сійӧс сӧмын сьӧлӧм кылӧ.

Менам шудлун — муса мортӧй,
Кодтӧг кӧдзыд менам гортӧй.
Менам шудлун — сылӧн олӧм,
Сӧмын сылы нэм чӧж колӧм.

2

Ӧтка олӧм вылӧ тэ эн вежав,
Кӧсъян тӧдны сылысь лёксӧ,
Кежав.
Менам керка пытшкӧй лӧнь да тыртӧм,
Гажтӧмлунсӧ кодкӧ сэтчӧ
Пыртӧм.

Йӧрмӧмаӧсь сэтчӧ ӧтка думъяс,
Майбыр, ачыд ыджыд колин,
Нюмъяв.
Ыджыдавны сӧмын некод вылын,
Вомгорулын мурга ме нор
Сьылан.

3

Кымӧр вевттьӧ тӧлысьсӧ,
Кодзулыс оз письт.
Шувгӧ-вашкӧ пармаыс
Гажтӧм-гажтӧм висьт.

Лунысь лунӧ кӧдзалӧ
Ывлаыслӧн лов.
Мыйӧн сьӧлӧм бурмӧдны,
Тэныд ог кӧ ков.

Кыдзи коръяс киссьӧны,
Пужъялӧ кыдз му.
Шоныд, мелі кывъястӧ
Он нин меным шу.

Регыд мусӧ шебралас
Кӧдзыд еджыд лым.
Сӧмын менам муслунӧй
Коляс важ моз пым.

4

Менам муса, тэ сьӧлӧмнад том,
И шӧвк юрсиыд важ моз на мича.
Ме ӧд тӧда, мый некор тэ он,
Кыдзи шуласны, ме вылӧ видзӧд.

Дерт жӧ, сёрми ме, мусмис тэд мӧд,
И эг ме тэкӧд бипурсӧ ломты.
Дерт жӧ, ме йылысь дыр тэ эн тӧд,
И мӧд морт тэнсьыд сьӧлӧмтӧ шонтіс.

Но и мед, ме и сы вылӧ рад,
Мый тэ олӧмӧ нэм кежлӧ пырин.
Вынсӧ муслунлысь петкӧдіс кад.
Эз кӧ збыльысь вӧв, важӧн нин бырис.

Сійӧ сьӧлӧмын, сійӧ оз кус,
Кытчӧдз лолала, мӧвпала, сьыла.
Сылӧн югыдлун кувтӧдз оз чус,
Менам кодзулӧй ӧзйӧ пыр вылын.