КУЛӦМЪЮ


Кулӧм — юыслӧн нимыс,
Кӧть и зэв аддзысь синмыс:
Джуджыд Тимансянь сійӧ
Сюртчӧ Эжвалӧн сывйӧ.

Абу паськыд ни джумъя,
Гачтӧг вомӧныс вуджан.
Кӧсъян — изъяссӧ лыддьы
Войся кодзувъяс пыдди.

Кӧсъян — шондісӧ шыльӧд, —
Визув сійӧс оз кылӧд.
Ӧшкамӧшкакӧд тані
Коркӧ сёрнияс панлі.

Нывкӧд берегас важӧн
Рытъяс коллявлім гажӧн.
Сылысь малавлі пӧся
Рудзӧг кольта кодь кӧса.

Быттьӧ нимкыла ваыс —
Овлӧ чӧскыдджык маысь.
Матӧг позьӧ на овны,
Ватӧг — сьӧкыд тай ловлы.

Кӧть и нимыс тай — Кулӧм,
Сійӧ паськыда тулӧ.
Лэбзьӧм водзвылас юсьыс
Васӧ юлӧны юсьяс.

Пыді пармаын юыс
Индӧ кыйсьысьлы туйсӧ.
Коркӧ ми-вокыс кулам,
Сӧмын оз кувлы Кулӧм.