КУЧИК ЙИРЫСЬ

Менам ыджыд вок мыйкӧ этша вурсис-керис: сапӧгъяс да кӧтіяс дӧмліс. Татшӧм вурсьысьястӧ «кучик йирысьӧн» вӧлі вильшалӧны. Сюсясӧ вурсьыныс оз на вӧлі куж, велӧдчӧ на вӧлі — сылы ӧд дас квайт арӧс муртса на тырис. Да и нинӧмысь вӧлі бур кӧмкотсӧ вурныс: сылӧн вӧлі сӧмын важ сапӧг гӧленьяс да мый да — кормӧмаӧсь, косьмӧмаӧсь, трачкакылӧны, кыз сюмӧд кодьӧсь.

Менам вокӧй кыськӧ кывлӧма: кучиктӧ кӧ пӧ касторкаӧн мавтан, сійӧ небзьӧ, кос сапӧг гӧленьшойыд пӧ заграничнӧй кучикӧ пӧрӧ, кодысь вурӧны мича кӧмкот кос кока господалы. Сідзкӧ, важ косьмӧм сапӧг гӧленьысь позьӧ вӧчны небыдик заграничнӧй кучик: шегрень, гамбург да мукӧд пӧлӧс. Но кытысь босьтны касторкасӧ? Ньӧбны — деньга абу. Да и оз на ӧд ещӧ вӧлі вузавны.

Ми вӧлі ой-ой сюсьӧсь! Мӧвпыштім да артыштім да и касторка судзӧдан туй аддзим. Ми тӧдам вӧлі: касторкатӧ гырк йӧртӧмысь сетӧны больничаын. Ыджыд вок менӧ сэтчӧ и ыстіс. А больничаыс вӧлі куим верст сайын, вӧлӧсть мӧдар помас. Менӧ велӧдӧ ыджыд вокӧй: тэ, шуӧ, пыр фельдшер ордад да шу — гыркӧс пӧ йӧртӧ, запор пӧ. Тэныд сетасны рецепт касторка вылӧ, рецепт сертиыс аптекаысь дон босьттӧг сетасны касторка.

Менам эськӧ некутшӧм гырк йӧртӧм эз вӧв, но ӧд телепит касторкатӧ судзӧдны, медым важ сапӧг гӧленьысь заграничнӧй кучик вӧчны. Да и вокӧй сапӧг кӧсйӧ вӧлі вурны меным тайӧ кучиксьыс.

Муні фельдшер ордӧ. Сійӧ юасис-висьтасис, видлаліс рушкуӧс и мышкуӧс. Ме, мися, тӧлысь нин эг асмогасьлы, а сёя тыр бура. Сійӧ шензьӧ: кытчӧ нӧ пӧ тӧрӧ? (Ме вӧлі думайта, кымын дырджык висьӧмӧн висьтася, сымын унджык сетас касторкатӧ). Фельдшер печиктіс меным рушкуӧ да шуӧ: «Пырысь-пыр тэнӧ бурдӧдам».

Сэсся матӧ стӧкан джын касторкатӧ кисьтіс, сетӧ меным: «На, ю!»

Ме чезрася, пыкся, ... но мый керан, быть ю. Юи пыдӧсӧдзыс! Сэсся котӧрӧн гортӧ мӧдӧдчи. Фельдшер шуӧ: он кӧ пӧ бурд, ещӧ волы, ещӧ лечитыштам. Кутшӧм али ещӧ волӧм! Ме пыр и бурді: куим версттӧ вӧлӧсть кузяыд мунігад, гашкӧ, дасысь лои карта сайӧ ветлыны.

Гортӧ вои, кыз синваӧн бӧрда, вокӧс пиняла, «кучик йирысьӧн» ыждӧдла. Мун, мися, ветлы карта сайясас кучиктӧ небзьӧдны! Гортсаяс гирзьӧны-сералӧны ме вылын. Менам синваӧй шорӧн визувтӧ, а налы серам! Со ӧд кутшӧм овлӧ кучиктӧ небзьӧдӧмыд! Сапӧгшойсьыд заграничнӧй кучиктӧ вӧчӧмыд!

Эз ликмы вокӧйлы кӧмкот господалы вурны. Важ мозыс сійӧ бакилӧяс да кӧтіяс дӧмліс. А господаясыд кӧтітӧ да бакилӧтӧ оз вӧлі новлыны.