КОР МЕ ПЕТА СЫКТЫВКАРӦ

Ме рытын пета Сыктывкарӧ,
Удж бӧрын лётмунӧма — мудз,
Но пыр жӧ лоа дас квайт арӧс,
И юрам киӧн морт оз судз.

Ме лоа сэки збодер, ыджыд
И лунся мудзлунӧс ог кыв,
Дась венны туй вылысь став мыджӧд,
Мый кар мен восьтӧ паськыд сыв.

Оз прӧстӧйӧс, а нежнӧй, шоныд,
Кӧн мича гожся лунлӧн гож
И йирмӧгысь оз ковмы повны,
Кӧть пессьӧ бушков — тшук он вош.

И бушков пырыс синъяс бытшкӧ
Сё вожӧн локтысь югыд би,
И сійӧ пырӧ морӧс пытшкӧ,
И воӧ мӧвп, кыдз овлім ми.

Эг овлӧй — луасьлім ми няйтын:
Кык пӧвъя вӧвліс тротуар.
«Кор бара чегас!» — пыр ми кайтім,
Кор пемыд пуксьывлывліс ар.

Но тротуар эз чег, кӧть лайксис
Да вывлань брызьгис няйт и ва.
Сэт муніс морт и вӧчис ассьыс,
Кыдз корис уджсӧ лун, страна.

Эз ӧти морт, а сё строитель,
Быд киын вӧліс мастерок,
Мед сійӧн кыпӧдны кирпичнӧй
Зэв ыджыд коми кар выль ног.

Туй восьтіс налы Петр Ширяев — 
Сям тӧдысь каменщик-старик, — 
Пӧв посъяс вылӧ медводз кайис,
Тӧв пессис кӧть мед йӧй моз дзик.

Эз пов Изъюрова Раиса,
Ширяев бӧрся кайис тшӧтш.
Тшук колӧ ӧзтны первой бисӧ,
А сэсся паськалӧ туй кӧдж.

И кыптіс карным, мичмис сійӧ,
Ас юрнас пыкӧ енэж свод.
Тэ видзӧд, мыйта сэні бияс!
Выль туйӧд восьлалӧ народ.

И кор ме муна аслам карӧд,
Кӧть лётмунӧма — ставнам мудз,
Пыр лоа быттьӧ дас квайт арӧс,
И менам юрӧдз морт оз судз!