* * *

Бурсиа коми аньлы — Ёль М-лы.


	Кӧнкӧ, веж турун пӧвст
		муртса кылыштӧ «чоль...» —
	Чукльӧд-мукльӧдлігтыр
		сӧстӧм визувтӧ ёль.
	Ӧдйӧ, тэрыба зэв,
		уна, уна нин во
	Нуӧ котӧрӧн пыр
		югыд синва кодь ва...
	
* * *
	
	Мича веж коръя пу — 
		эзысь сюмӧда кыдз
	Менам юр весьтын дзик
		нора шпарӧдіс кырсь...
	Гӧгӧр, кытчӧдз оз судз
		синмыд, вӧр-пу йыв пом, — 
	Паськыд видзьяслӧн дор
		эз и тыдав некӧн.
	
* * *
	
	Гатшӧн куйла ме сідз:
		лӧзов енэж ме весьт;
	Думӧн лэбалі дыр,
		корси долыдлун сэсь...
	Кизьӧр, тшын-бус кодь руд,
		вылӧ лэбзьӧма ру, — 
	Ветлӧ кымӧрӧн пуж,
		гажтӧм эновтӧм му.
	
* * *
	
	Небыд турунъяс йыв — 
		тӧвру котраліс сэн,
	Налысь кокньыдик юр
		улӧ копраліс мем.
	Валӧн чольгӧм шы пыр
		кылӧ зэв лӧсьыд мойд,
	Меным сьӧлӧмӧдз дзик
		сылӧн инмис быд войт.
	
* * *
	
	Кыдзи унмовсиг дыр
		шензян вӧтӧн, — он чайт, — 
	Кодкӧ пель водзын сэк
		меным вашнитіс «ланьт!»
	Чӧскыд кӧр гӧгӧр весь
		турун дзоридзьяслӧн,
	Вӧр-пу сир дука тшын
		нырӧ ӧвтыштіс мем...
	
* * *
	
	Куньсян син лысъяс пыр
		югыд вуджӧр кодь, сыв, — 
	Аддза: сувтіс ме водз
		муса томиник ныв...
	Шонді югӧръяснас
		ворсіс юрсияс пӧвст,
	Кокньыд паськӧм сылысь
		муртса вӧрӧдіс тӧв.
	
* * *
	
	— Мый нӧ, эн ӧмӧй тӧд
		менӧ, муса тэ зон?
	Кодлы ассьыд тэ, том,
		сетін олӧмтӧ, ён?
	Код весьт сьӧлӧмтӧ, бур,
		видзин ӧнӧдз на пыр,
	Уна, уна нин во
		менӧ виччысин дыр?
	
* * *
	
	— Тайӧ — ывлавыв ме,
		кодӧс радейтлін тэ.
	Важӧн, важӧн нин зэв
		тэнӧ виччыся ме.
	Бара важ бӧрад моз
		вунӧд ассьыд тэ шог,
	Сэсся некор нин ог
		эновт тэнӧ ме, ог!
	
* * *
	
	Шойччы, дона мем морт,
		коли сьӧд пемыд вой,
	Эн нин дойдав, эн гӧр
		аслад сьӧлӧмлысь дой...
	
* * *
	
	Друг ме сыркмуні, садьми:

	— Кӧнкӧ, веж турун пӧвст
		муртса кылыштӧ «чоль»... —
	Чукльӧд-мукльӧдлігтыр
		сӧстӧм визувтӧ ёль...
	Небыд турунъяс йыв
		тӧвру котралӧ лӧнь,
	Налысь кокньыдик юр
		улӧ копралӧ мем...