КӦН ВИЗЫВТӦ ЁЛВА

Кӧн визывтӧ Ёлва
Да косьяс — он кат,
Лӧз синъяса ёльяс
Да сё перекат,
Сэн Емва ю бердсянь
Да Йирваӧдз пыр
Сё нэмъяс чӧж шувгис
Веж вӧр-багатыр.

Сэн ветлісны ошъяс
Да шынняліс руч,
И морт сэтчӧ вошліс,
Сям эзджык кӧ судз.
А ӧні выль шыӧн
Став пармаыс тыр.
И тайӧ выль шыыс
Тась некор оз быр.

Со пемыд сьӧрт сайын
Кран копрӧдлӧ юр,
И повзьӧ да кайӧ
Пу туганас ур.
И туй дорысь вӧрӧ
Тшӧтш пышйӧ гӧрд руч,
Оз аддзы мед сійӧс
Ён «МАЗ»-яслӧн луч.

Тӧжд тӧдлывтӧг овліс
Тан кодыркӧ сюзь,
А талун сьӧд войын
Оз ков да быть узь:
Син пӧртмалӧ сылысь
Быд воськолын би,
И петнысӧ полӧ,
Мед кодкӧ эз ви.

Сьӧд вӧръяслӧн туган
Дзик бӧрыньтчис тась:
Ми босьтім ас киӧ
Сы кырымысь власть.
Ми вӧрыслы шуим:
«Выль сьыланкыв сьыв,
Мед радлун век туис,
А шоглун эз кыв!»

И сьылӧны вӧръяс,
И косьяса ю.
Зэв лӧсьыдӧс бӧрйис
Тан гӧлӧссӧ шуд.
И юралӧ сійӧ,
Оз личӧдлыв гор,
И кокниа водзӧ
Век восьлалӧ морт!