КОМИ МУЫН ГОЖӦМ

Помасьӧ июнь —
Лӧддза-номъя тӧлысь.
Шоныд гыма-зэра
Пыр на сійӧ вӧлі.

И со потшӧс дорын
Июль тӧлысь — сора.
Регыд косаясӧн
Видзьяс вылӧ корас.

Медым миян Сюрук
Вобыд вердіс йӧвнас.
Ковмас уна турун
Сылы вердны тӧвнас.

Саридз дорӧ мунны
Сьӧмтӧ, дерт, он чуктӧд.
Ёль дор видзьяс вылын
Турун запта-пукта.

Пажнайтігӧн ёляс
Ыркӧдчыны водла.
Вежалас мед сійӧ,
Саридз дорын коді.

Вуграсьны на слӧйма —
Шедас зарни чери.
Кисьмас вотӧс — вотча.
Унатор на кера.

Чужан Коми муын —
Видз вылын и вӧрын,
Ставыс сэтшӧм муса,
Мича, чӧскыд кӧра.

Катшасинма видзьяс
Купальнича сорӧн.
Льӧм пуяс да кыдзьяс
Чукльӧдлысь ёль дорын.

Кӧч бӧж кузьта гожӧм
Он и тӧдлы коляс.
Но оз вун нин некор
Синва кодь сӧдз ёльыс.