КОМИ КЫПӦДСюрс во нин нэмйӧ Коми муыд... (Зэв жеба сэні олім ми). Эз тӧдлы ӧнӧдз сійӧс некод, Мый коми йӧз эм, сэтшӧм му. Но воис мездысь революция — Пыр вежсис сылӧн олӧм сям; Сэк шызис-ловзис коми нация, Сьӧд йӧзлӧн сувтіс Сӧвет власьт. Вежис ёсь гыжъя кутшӧс Союз мӧлӧт да серп! Тшӧтш босьтчис, сэтчӧ йитчис Коми пищаль да чер! Эз тӧждлы сарыд тшыг йӧз вӧсна, Эз восьтлы водзӧ олан туй; Тай сӧмын кульліс сизим пӧвстӧн Да дорліс адӧ поп-дяк ен. Но ставсьыс сыысь ӧні мынім — Туй югыд, восьса миян син; Ми тӧдам, коді миян енным — Морт вежӧр уджлӧн ыджыд вын! Ӧні — некодысь повны: Мӧскуа — абу сар! Быд йӧзлы позьӧ овны, Эм налӧн СССР! Ми мездмим сарысь, капиталысь... Эг мынӧй ӧтиторйысь ми, Эм нӧшта вермӧдантор миян — Лёк, кӧдзыд, ловтӧм ывла вын. Кор мездас кипом сьӧкыд уджӧс Бур кӧлуй да наука вын, Сэк вуж додь, пурйӧс кӧрт вӧв вежас Да доддясяс ён ывла вын. Кодыр сартасӧс кусас Электричество би. Сэк машинаӧн кутас Удж керны коми пи! Быд бурыс миян муын уна, Эм уна миян озырлун! Тай сӧмын сійӧ кӧнкӧ пыдын, — Из куд улын куйлӧ кын. Вай корсьны босьтчам сійӧс ставӧн, Мед сійӧ уджӧ сьӧлӧм дон! Сэк олӧм миян лоӧ славӧн, Оз важкодь жеб ло, а зэв ён! Медым ыліӧдз кылас Выль ног олӧмлӧн гым! Мед кӧрт нӧш ёнтас-зымгас, — Тшӧтш сьылас уджлы гимн.
