КОЛЛЬЫСЬЫСЬ


Паськыд, садъя мир туй кузя,
Са кодь арся пемыд вой,
Рӧдтӧ-пызйӧ пара вӧла;
Кӧть и пемыд — ямщик збой.

Вӧтлӧ вӧвъяс пуклӧс вылын,
Мыйкӧ мургӧ-сьылӧ пыр.
Сылӧн коллянторйыс доддьын
Кывзіс сьылӧм вель нин дыр.

«Мый нӧ татшӧм нора сьылан,
Косьтан сьӧлӧм сись кодь морт;
Дзоридз дырйи вир-яй воштан, —
Томӧн корсян гу да горт».

«Кывзы, другӧ, Треня сиктын
Шаня быдмӧ мича ныв.
Сійӧ тӧрыт шуис меным
Медся бӧръя лэчыд кыв:

„Весьшӧрӧ пӧ менӧ корсян,
Меысь бурджык сюрас тэд;
Ичӧт кага моз пӧ ышман...
Ме кодь нылыд эм на мӧд“.

Со мый понда нора сьыла,
Ог-ӧ шогӧс этша вен.
Сӧмын нывлӧн оз вун кывъяс, —
Юргӧ пельӧ, быттьӧ звӧн».

Дыр на ямщик мыйкӧ сьыліс.
Кузя юргис тільгун гор.
Сьылӧм шыӧ вӧрыс садьмис,
Ёна шувгис кыдзлӧн кор.