КОДАРАС МИ


Мед
кӧть и сьӧкыд
ӧнісӧ овны — 
	колям
	ми век
таладор пӧлас.
Медым
кӧть мыйӧн
ми воксӧ шуасны,
	сынам
ми пыр
выльла дор.
Мед
кӧть и лякласны
мукӧд дыр миӧс:
	«сійӧ пӧ вошӧма
	сюрӧса туйсьыс...» — 
сы понда
ог шыбитчӧй
мӧдарла пӧлас!

* * *

	Олӧма
му вылын
	нелямын во:
	кык юкӧн — 
важ мирын,
	коймӧдсӧ
		выльын.
Мед
унджык кӧ
кольӧма сэні, — 
олӧмыс миянсӧ — 
	тані!
Некод оз лысьт
тойыштны миӧс
важ мира
	йирӧ.
	Мыйла?
Да сійӧн, — 
мый сьӧлӧмъяс
йирӧмӧн йирліс
важ олас мирыс!..

* * *

Кывзыштлы тэ,
сӧвъяммӧм том,
	комсомол зон!
Кывзыштлы тэ,
	нэриник,
	пионер пиӧ!
Кывзыштлы тэ
эзысь кытш пельнад,
Октябрлӧн челядь!
(Кывзыштлӧй быдӧн,
коді синма да пеля!)
...............................

Некор оз вун
	юль кызьӧд лун
сюрс ӧкмыссё
дас нёльӧд волӧн.
	Оз вун
сійӧ кос гожся лун,
кор ӧтнасӧн сар
	миллён йӧзӧс
	минутӧн
ытшкигкост нетшыштіс,
	шуыштіс:
«Мун
турун пыдди
ӧт-мӧдтӧ шыр!»
	Некор оз вун,
кыдз «запаснӧй»
	мунігас
бӧрдысь гӧтырлы
	сетіс
дзик ӧти шайт.
	«Н-на!» — шуис, — 
тайӧ кӧть тэныд
овмӧстор коля,
да эн казьтывлы
	лёкӧн,
локта кӧ ме
куим кокӧн...»
Та йылысь лыддьыштлы тэ,
	зарни пиӧ,
«Сар война»,
	«Микитлысь олӧм»...
А он кӧ тэ меным
да книгалы-гижӧдлы
	верит, — 
корсьлы тэ сы йылысь
ачыд документ.
	Корсьлы тэ
улыс кум джаджсьыд
айыдлысь
важ салдатсянь
мӧдӧдлӧм письмӧсӧ,
	лыддьыштлы
мамыд синваӧн
кӧтӧдӧм письмӧсӧ.
	Тшӧктыштлы тэ
	пу кока чожтӧ
	«мойдыштны»,
кыдзикӧн вуджлісны
		Карпатті,
	кымынӧн
	слуда бок
		кымыньӧн
		кольлісны;
Кавказ сёртассӧ
	тыртлісны
		шойнаныс,
		кыдзикӧн
окопын куйлігӧн
	тырлісны
		тойнаныс...
Видзӧдлы сэсся
		книгаӧ тэ
серпастор вылӧ:
мерлина юр лыысь тэчӧм
гӧра кодь чукӧр
	(абу-ӧ айыдлӧн
		юр лыыс тані?)
......................................

Лыддьыштлы тэ
	Варышлысь
«Чераньяс, гутъяс»
	да мӧвпыштлы,
		мый понда
буржуйыс кыз,
	кор сійӧ
		жуйвидзліс бура, — 
тӧдан сэк, мыйла
	уджалысь мортыс
печкан кодь кос...
		Тӧдлін-ӧ тэ,
кыдз горш купеч
		кыйсьысьлысь
ур кучик ньӧбліс
	ыргӧн грӧш донӧн,
а вузавліс рубӧн?..
Кыдз урадник, стражник
	мужиклысь
кисьтлывліс пинь...

* * *

Лыддьыштлы тэ
(матынджык тайӧ)
«Сыктывдін карын
кылӧ гажа звӧн»...
	Кодъяслы
		вӧлі сэк
	«Ыджыд лун»
и кодъяслы курыд
«Шог асыла лун»...
Корсьыштлы сэсся тэ
	асланыд керкасьыд,
абу-ӧ кольӧма-сь
«на память» еджыдъяс
	кутшӧмкӧ пас:
		абу-ӧ стенад
штыкъясӧн зургӧм
	чунь тӧрмӧн розь.
Абу-ӧ потӧма
джодж плака пӧвйыд
	прикладӧн
зутшыштӧм помысь
	(мӧрччӧма гӧп?),
кыдз весьӧпӧрлӧма
мамыд ли чожыд?
.................................

Петавлы сэсся тэ
сикт саяд,
абу-ӧ кӧнкӧ,
потшӧс бокын
либӧ пес керас вӧрад
	кутшӧмкӧ пас?
	Кывзыштлы,
мый йылысь шувгӧ
	лысъяснас скӧра
гӧгӧрыс сулалысь вӧр;
	ю дор кӧ,
юкмӧс дор весьт,
	кытчӧ сэк пачкаӧн-пачкаӧн
		сюйлісны йӧзӧс
			вой шӧра
веж мороз войын
дас ӧкмысӧд воын...
.....................................

Ставсӧ тэ
тэч тайӧс юрад
	да
пель гӧгӧрыд гарт!
	Быдман да мед
	некод нин оз,
сідзикӧн важ моз,
	ныр-вомад либӧ
	пель дінад варт.