КИРША ВАСЬ ПӦЛЬ ЙЫЛЫСЬ БАЛЛАДА

Куліс пӧрысьла быд лун
Кирша Вась, и вот,
Кув мысьт веськӧдны кузь ун
Вӧчис аслыс горт.
— Ӧкмысдасӧс тырті ар, — 
Шуӧ, — сё оз ков.
Олӧм — дзирдалана юр,
Пи шудысь ог пов.
Сылӧн аслас пи да ныв,
Тӧдӧны быд мог.
Овны вынлун кӧ ог кыв,
Кувны абу шог. — 
Пывсис-мыссис колӧм ног,
Вежис дӧрӧм-гач,
Водіс гортйӧ — кулӧм ног
Сэні куйлӧ нач.
Бӧрдӧ Вась вӧсна сусед,
Бӧрдӧ став колхоз:
— Збыль мӧй нималана дед,
Додь вӧчысь, оз ло?... — 
Бӧрдӧ йӧз. И друг — «Война, — 
Кыліс сёрни сор. — 
Сувт ас му вӧсна, страна,
Сувт да вермӧм дор!» 
— Кыдзи? Кыптӧма война?
Кувны абу кад! — 
Чеччис Вась: — И ме салдат,
Тышӧ сувтны рад.
Меным кӧть и ӧкмысдас,
Уджын лоас сер,
Важ моз песовтчас додь яз,
Кывзысяс и чер! — 
Эз и шойччыв войнабыд
Врагӧс зырны тась
Вӧчис додьяс — абу лыд — 
Фронтлы Кирша Вась.
Эз кӧ тулыс вӧв, то, дерт,
Эськӧ сылӧн додь
Пырис и Берлинӧ, мед
Ыджыд би кыв кодь
Вылӧ лэптыны гӧрд флаг — 
Вермӧмнымлысь пас,
Нэмсӧ тӧдіс мед рейхстаг:
Сійӧс босьтім. Тас!
Но вот тулыс. Нинӧмтор,
Вӧчис ассьыс удж.
И эз жебмы сылӧн гор, — 
Юралӧ быд сутш!