КАРПАТ ТУЙ КУЗЯ

Гӧра йывъясыс кымӧръяс сайын,
Сэтчӧ кокниа некыдз он письт,
Но пос тшупӧдъяс вывті моз кайӧ
Ёна ружтігтыр миян «Турист».

Ок и чукыльӧсь-мукыльӧсь туйыс,
Быттьӧ важӧн нин пакталӧм шор.
Кадысь-кадӧ сьӧд читкыля уссӧ
Кинас малыштлӧ миян шофёр.

Водзын — гӧралӧн медджуджыдіныс,
«Перевал» — сылӧн татшӧм и ним.
Сійӧ унаӧс кыскӧ ас дінас,
Сэтчӧ туйнымӧс кутам тшӧтш ми.

Воча волӧны пашкыртчӧм пожӧм,
Сёртас бокшаын дӧввидзысь дуб.
И шофёрлӧн пыр долыдмӧ чужӧм, —
Ывла серпасыс сылы зэв люб.

А ми ортсыӧ видзӧдны полам, —
Гӧра сёртасыс пемыд да крут.
Бытьӧн дум вылад татӧні волӧ
Эжва юбокса шыльквидзысь луд.

Быдӧн полыштам гусьӧн и явӧ —
Тайӧ туйыс нӧ помасьлас оз?
И шофёр вылӧ видзӧдам ставӧн,
Ставӧн видзӧдам Ен вылӧ моз.

Закарпатье, Виноградово кар.