КАР ВЫЛӦ ПУКСИС СЬӦД ВОЙ


Кар вылӧ пуксис сьӧд вой.
Кытӧнӧсь войтырыс, кытӧн?
Чӧскыда узьӧны быдӧн...
Кар вылын латшвидзӧ вой.

Ичӧтик дзузалӧ би,
Коді нӧ сэтӧні би дорас?
Кодлы нӧ этатшӧм сёрӧн
Мусмӧма дзузалан би?

Дерт, кӧнкӧ, томиник морт
Би дорас ӧтнасӧн пукӧ.
Ог тӧд ме, гажа-ӧ, жугыль
Бидорса томиник морт.

Гашкӧ нӧ, нэриник ныв.
Сьӧлӧмыс нюкрасьӧ, висьмӧм,
Кӧзюклы лӧсьӧдӧ письмӧ
Оз тусь кодь нэриник ныв.

Том дырсӧ казьтылӧ пӧль?
Висьысь морт ружтӧ и кашкӧ?
Выль олысь чужӧ сэн, гашкӧ?
Код сэні? Том морт-ӧ пӧль?

Код тӧдас, мыйся сэн морт —
Сьӧд войыс пельтӧм и кывтӧм...
Енэжті тэсь тасьті кывтӧ...
Код тӧдас, мыйся сэн морт?

Кар вылын шлыпвидзӧ вой.
Кытӧнӧсь войтырыс, кытӧн?
Ныргорӧн узьӧны быдӧн.
Кар вылын шлыпвидзӧ вой.