ИВАН КУРАТОВ — АСЛАС КИБРАЫН

Дыр локтӧм мысьт вӧр туйӧд, кыткӧ сэт,
Кӧн шор да кыскӧд, вӧр — оз тыдав помыс,
Ас Кибра сиктас воськовтіс поэт
Да видзӧдліс сы вылӧ уна во мысьт.

Мый выльыс сэн? Эз вежсьы нинӧмтор, — 
Крут гӧра йылын аслас Карта грездыс
Пыр важ кодьыс на ичӧт, пемыд, нор,
И йӧз эз мынны гӧльлун черань везйысь.

Крут гӧра горув восьлалӧ мужик,
И вылысас — кыз лякысь кыӧм шабур.
И сійӧ Робинзонлӧн кодь жӧ дзик,
А бурджыкыс эз вӧв и сылӧн абу

Буб ю дорын со гӧрӧ кодкӧ йӧр,
И вӧлыс сылӧн муртса-муртса ветлӧ;
Кос сёйсӧ ӧдва парсалӧ пу гӧр, — 
Сэн ӧвтчыны-ӧ коркӧ сьӧкыд шеплы?

Оз, рудзӧг сэн оз кыпӧдчы, кыдз пыш,
Кӧть кыдзикӧн кӧзяиныс оз мырсьы.
Но кытчӧ пышъян? Быть ӧд пӧсьӧд мыш,
Кор керка тырыд челядь — мольяс гырся.

Оз тӧдны найӧ, воӧ, али оз
Му вылад няньыд — лӧвтӧны: «Вай сёйны!»
А карысь воас чин, тэ пукты доз,
Кӧть кыдзи тэнад сьӧлӧмыд оз доймы.

Он пукты кӧ, он керав сэки пес
И пармаӧ он пет, мед ур сэсь кыйны.
Начальство пытшкын вӧрзьӧ сэки бес,
И дасьӧсь пыр острогӧ тэнӧ сюйны.

Ас Кибра вылас видзӧдӧ поэт, — 
Оз, тані сійӧс нинӧмтор оз гажӧд.
Тан мича петас некӧн нюм оз сет, — 
Став вужъяс сылӧн косьмӧмаӧсь важӧн.

Мый йылысь тані сьывны? Кутшӧм гор
Лӧз эрдас джуджыд гӧра йывсянь лэдзны?
Пыр нимӧдны мужиклысь синва шор,
Мед сьӧлӧм вылас таысь лоас сӧдзджык!