ИЧӦТИК МАКСИМ


Ёна жӧ ми ваксим,
Кор ичӧтик Максим,
Кыз синваӧн бӧрдіг,
Котӧртіс туй шӧрті
Дедыс дінӧ скач —
Урпи этшӧн нач.
Сё чудеса дивӧ!
Эгӧ тӧдӧ ми ӧд,
Мыйла бӧрдӧ сійӧ —
Тайӧ ичӧт пиыс,
Сылысь кутшӧм шог
Тадз чожмӧдлӧ кок?
Прӧста, вӧлӧмакӧ,
Сералам вак-вакӧн:
Збыльысь сылысь сьӧлӧм
Шог нюкыртӧ вӧлӧм.
Мыйся лоӧм шог,
Сэсся кывзы лок!

* * *

Вӧлі гожся асыв.
Буретш сизим часын,
Кодыр керка тырыс
Шонді югӧр пырис,
Югдіс узянін,
Максим восьтіс син.
Локтіс ӧшинь дорӧ
(Шонді синсӧ ёрӧ),
Чуймис ичӧт пиыд:
Шег кодь курӧгпиян
Ветлӧ тивзігтыр
Ӧшинь улас тыр!
Мамыс потшӧс бердын
Курӧгпиян вердіс.
Дас кыкнанныс быдӧн
Кокалісны шыдӧс.
«Тип-тип, кот-кот-кот,
Налӧ сёйӧ вот!»
«Муна ме удж вылӧ, —
Мамыс шуӧ, кылӧ, —
Татӧн ӧшинь улас
Зэв сюся тэ сулав;
Некытчӧ эн пет,
Кытчӧдз оз во дед.
Кӧть и сійӧ пӧрысь,
Абу нин кӧть гӧрысь,
Мортыд оз ов сідзи:
Колхоз амбар видзӧ.
Стӧрӧж сійӧ сюсь —
Кузь войбыд оз узь!..»
Сэсся мамыс муніс...
Гажа вӧлі луныс:
Олӧм гӧгӧр жуис.
Максим аслыс шуис:
«Вит арӧс нин мем —
Вын-эбӧсӧй эм!»
Керкабердса йӧрӧд
Ветлӧ водзӧ-бӧрӧ:
Часӧвӧй ӧд сійӧ,
Ичӧт пиыд миян!
Киас кутӧ ньӧр,
Чужӧмыс зэв скӧр.
Катша майӧг йылын
Кыдзи кужӧ сьылӧ.
Пышкай радла йӧктӧ.
Чикыш гутъяс ӧктӧ.
«Налы (ме ог пов!)
Курӧгпи оз ков».
Ыж бакӧстіс со тай,
Вӧв чотликтӧ-чотӧ.
«Тӧда — налы эськӧ
Курӧгпиыд веськодь.
Котӧртіс гӧрд чань...
Чаньыд абу кань!»
Жарыс содӧ-й содӧ,
Гожся шонді сотӧ,
Лы-вемӧдзыд сидзӧ.
Максим курӧг видзӧ,
Стӧрӧж сійӧ сюсь:
Ичӧт пи оз узь!
Сулалӧ пост вылын.
Окота, дерт, сылы
Берег дорӧ мунны,
Ыркыд ваӧ сунны...
Оз позь кольны пост,
Оз позь, оз позь, оз!
Бобув, мича бордъя,
Мӧд бобулӧс ордйӧ;
Небыд эжа вылын
Чирк, кузь кока, сьылӧ:
«Чирик-чирик-чирк».
Чеччышталӧ звирк.
Мудзис ичӧт пиыд.
Эжа вылӧ сійӧ
Пуксис да и суніс,
Ставыс сылӧн вуніс:
Личкис сійӧс он —
Сьӧкыд он, зэв ён.
Вӧт вӧталӧ мортыд:
Бригадир сы ордӧ
Локтіс, шуӧ сійӧ:
«Видзӧдлы мун, пиук,
(Детинка тэ сюсь!),
Оз-ӧ дедыд узь!»
Максим войнас сёрӧн
Мунӧ амбар дорӧ.
Видзӧдӧ, да дедыс
Шкоргӧ-узьӧ сэтӧн.
Ӧдзӧс гурйыв... Мат!...
Войыс — вой шӧр кад.
«Стынитан пост вылын.
Абу яндзим? Кылан?..»
Он йывсьыс моз сэки
Кравзӧм кыліс регыд:
«Крав да крав да крав!»
Курӧгпи — сюв-сяв.
Сувтіс Максим миян,
Лыддис курӧгпиян:
«Ӧти ...мӧд да нёльӧд...
Дас ӧти тай кольӧм.
Дас кыкӧдыс кӧні?
Мый ме шуа ӧні?
Ырӧстіс лёк горӧн,
Котӧртіс дед дорӧ.
Дедыд, повзис сійӧ:
«Мый нӧ лои, пиӧ?
Эн-ӧ поткӧд юр?
Эз-ӧ Катшыс пур?
Эз-ӧ рака пышйӧд
Курӧгпитӧ гыжъяс?»
«Пышйӧдіс горш рака!» —
Вочавидзис кага.
«Эн бӧрд, пиук! Мед! —
Шуис сылы дед. —
Сюся овны! Кылан?
Часлы быдман, пиӧ,
Лоан отсӧг миян;
Лоан шань да сюсь:
Кор оз ков, он узь!»