И. А. КУРАТОВЛЫ


Сьӧд пемыд кадын тэ олін,
Шувгис кор лэчыд вой тӧв.
Здук кежлӧ Комиӧ волін,
Узис кор Комиыд чӧв.

Медвойдӧр меліа сьылін,
Лелькуйтін ас чужан кыв.
Кывбуртӧ тэчин тэ ылын —
Комиӧдз шыыс эз кыв.

Олӧмыд зэв вӧлі жугыль:
Кыдз толькӧ сарыд эз дур...
Ас чужан му йылысь, другӧй,
Мӧвпаліс пыр тэнад юр.

Кывбурыд вӧлі ӧд чурка:
Пыдди эз пуктывны сэк...
Ӧні со пасьтала юргӧ
Пармаын дугдывтӧг век.

Сьӧлӧмным ыпъялӧ биӧн...
Казьтылам тэнсьыд бур ним,
Нэмсӧ мед нималас сійӧ,
Дзирдалас-ломзяс, оз сім!