ГЫРЫСЬ ЙӦЗ ОЛӦМЫСЬМыйла сійӧ, Тӧдны колӧ, Мортыд, пиӧ, Мӧд кодь лолӧ. Со нин абу Важ кодь Габӧ… Тӧдлід серсӧ? Мый эз керсӧ! Вӧліс зептас, Нырсӧ лэптас, Нэмсӧ олӧ, Быд гаг полӧ. Кучкас, вачкас, Виас, начкас — Куландорас Морт оз норась! Ӧтчыд корсян, Дасысь ворссян, Губернатор Сувтас та дор. И эз сьӧмӧн Босьтлы сӧмын, Вӧліс эма Да и вема. Коді урӧс Сэтшӧм вӧвліс — Сэтшӧм бурӧс Коркӧ ӧвліс? Сэтшӧм, пиӧ, Вӧліс сійӧ — Кад со воис, Зэв рам лоис! Оланінсӧ, Каршӧрдінсӧ, Ӧні вежӧм, Ылӧ кежӧм! Барин дінӧ Табель лунӧ Копыртчыны Онӧ мунӧ — Оз нин видчы, Оз нин бритчы, Абу мыссьӧм, Паськӧм киссьӧм! Оз лок кортӧг, Оз вӧйп ковтӧг, Оз нин окась, Оз нин кокась… Асьсӧ ӧні Йирлывлӧны, А оз курччась Сылӧн юрчась. Синтӧм, вынтӧм Рама Габӧ Ад туй вылын Гуас бабӧм… Мыйла сійӧ, Тӧдны колӧ, Мортыд, пиӧ, Мӧд кодь лолӧ… Сӧмын сьылӧм М’оз ло ёрсьӧм, Небыд нота Помас корсям. Аддзам, аддзам, Муса коми, Аддзам, аддзам Бурджык пом ми. Тшӧтшкӧртчасны Авъяс, вынъяс, Кулаласны Исполинъяс. Торйӧдчасны Чинӧн, сьӧмӧн, Ӧтласясны Велӧдчӧмӧн. Мыйла сійӧ, Тӧдны колӧ… Сэсся, вокъяс, Бура олӧ!
