ГУЦУЛЪЯС ОРДЫН


Веж Карпатъяслысь мичаник серпассӧ,
Гуцул нывъяслысь лӧсьыдик стать,
Бобӧняньяса пӧката эрдъяссӧ —
Татысь аддзыны сьӧлӧмӧй рад.

Еджыд кымӧръяс гӧраын шойччӧны —
Гӧра йывъясыс ставыс дзик дзор.
Увтасінъясӧ керкаяс вӧйтчӧмны,
Ылӧдз юргӧ трембиталӧн гор.

Уна рӧмъяса паськӧмыс йӧзыслӧн,
Ыж ку киптаръяс — мойдын кодь дзик.
Гӧра бокшаын дзоридзьяс ӧзйӧны,
Кисьмысь яблӧгӧн видзӧдчӧ сикт.

Петан рытгорув гожся лӧнь ывлаӧ —
Коломыйкаяс чужтасны нюм.
Ӧшинь увъясын сьыланкыв шыалӧ:
Кывзы мыйта кӧть — некор он ум.

То Маричка, то Анча, то Галочка
Кытшӧ корасны — йӧктыны пет.
Рочӧн мылаа сьылӧ Наталочка,
Гӧсьтӧс гажтӧмлун эз шымырт мед.

Шонді югӧрысь чусмӧма синкымныс,
Чужӧм выланыс пемыдгӧрд гож.
Сиктысь войтырсӧ тӧда ме нимнаныс,
Быдӧн — гӧраса ю кодь жӧ чож.

Тані быд пӧрйӧ друг ордӧ волывла,
Варов сёрниным войӧдз оз ор.
Сійӧ ошкӧ ас сиктаныс олӧмсӧ,
Водзті вӧвлӧма коді зэв нор.

Сійӧ радейтӧ шондіа лунвывсӧ,
И Карпатъясӧс нэм чӧж оз веж.
Чужан мусӧ код кокниа вунӧдӧ,
Олӧ му вылас джынвыйӧ весь.

Менам парма эм, пӧртмасьысь кыа и,
Мамӧн козьналӧм мусаник кыв.
Эг ӧд весьшӧрӧ ёртӧйлы ас кывйӧн
Тайӧ кывбурсӧ талун ме кы.