ГОЖӦМ ЭШТІГӦН

Кыдзкӧ тӧдлытӧг, кывлытӧг ни аддзывтӧг, небыдик кока рыжӧй кань моз пырӧма да тапикасьӧ пуяс костӧд ар. Гожӧмӧй, менам шуда гожӧмӧй, вот и колин тэ менӧ дзик ӧтнамӧс. И ог кӧсйы да мӧвпавсьӧ, быттьӧ мунӧ ме дорысь менам олӧмын медбӧръя гожӧм.

Став шоныдсӧ, шаньсӧ, став мичсӧ да муслунсӧ видзлӧмыд тэ менлы вылӧ: и шондіыслысь вижов-зарни югӧрсӧ, и енэжыслысь лэбач тыра синсӧ, и весиг зэрыслысь ки пыдӧс вылын дзирдалан югыд войтсӧ.

Но лыа моз кадыс, и синва моз кадыс киссьӧ муас менам тіралысь чуньясӧй костӧд. Сувтӧдны сійӧс да кутны киын ме ог куж ни ог вермы. Прӧстит менӧ таысь, гожӧмӧй. Прӧстит, гожӧмӧй, да прӧщайт...