ГИЖЫСЬЯСЛӦН ОЛӦМЫСЬ
«Войвыв кодзув» журналӧ ӧти коми гижысь вайис серамбана висьт. Сетіс лыддьыны Владимир Ширяевлы. Виччысьӧ, кор ответственнӧй секретарь семдас серамысла.
— Но, кыдзи?.. — юасьӧ автор.
— А лок мышкӧд гильӧдышт, гашкӧ и гигзьышта, — вочавидзӧ мӧдыс.
Уджавліс ӧти коми гижысь «Югыд туй» газетын корреспондентӧн. Ӧтчыд сійӧ Изьва районысь (дас лун ветлӧм бӧрын) блокнотас вайис сӧмын ӧти сёрникузя: «Мӧдлапӧлын тыдалӧны мӧсъяс да йӧз, турун заптӧны кӧ-а?..»
Во джын мысти тайӧ жӧ гижысьыс паныдасяс карса улича вылын главнӧй редакторыскӧд. Мыйла нӧ пӧ он чолӧмась, юалас газетнад веськӧдлысьыд. Ме пӧ тӧдтӧм йӧзкӧд некор ог варовит, вочавидзас мӧдыс.
Висер вожӧ воласны йӧзкӧд аддзысьлыны коми гижысьяс И. Вавилин да В. Ширяев. Вузасясны и книгаяснаныс.
— Лоӧ пӧ ӧти книга сюмӧд пыдди пач ломзьӧдны босьтны, — гораа юӧртас менам чой.
— Менсьым босьт, менам унджык листъяса, — шуас Владимир Архипович.
Ӧтчыд сира турун моз сибдіс-клеитчис ме дорӧ карса ыджыд лавка кильчӧ вылын чиганка:
— Вай дас шайт и висьтала став збыльсӧ.
Висьтав, мися, дыр-ӧ ме нӧшта ола тайӧ грека му вылас. Зэв пӧ дыр олан, он кӧ кадысь водз кув.
Шойнатыын лыддьысьысьяскӧд аддзысьлӧм бӧрын дебаркадер вылын В. А. Ширяев виччысьӧ Кулӧмдінысь Сыктывкарӧ лэччысь паракод.
А дебаркадерыд сійӧ паракод кодь жӧ, ӧшиньӧдыс кӧ видзӧдны ва вылас, быттьӧ кывтан либӧ катан. Вунӧдчас гижысьыд, мый сійӧ эз на сӧв паракод вылас. Сы кості сувтлас «Коми колхозникыд» и бӧр нин торйӧдчас да мӧдӧдчас бруткыны карлань.
Владимир Архипович шенасьӧ кинас: аддзысьлытӧдз пӧ, Шойнаты. А паракод ылысянь нин тутӧстас сылы воча: прӧщайтлы пӧ, шань гижысь, мӧдысь волытӧдз!
Паныдасисны кык гижысь. Ӧтиыс аддзӧ мӧдсӧ садьӧн да чуймӧмӧн юалӧ:
— Мый нӧ, другӧ, шыбитін юнытӧ? Дыр-ӧ нин он ю?
— Аскомысь коймӧд лун лоӧ, — вашмуніс мӧдыс.
Модаӧ пырис вина юӧмысь да куритчӧмысь кодируйтчӧм. Ӧти коми гижысьӧс ас кӧсйытӧгыс вӧтлісны пенсия вылӧ. Сьӧм эз кут тырмыны весиг сёйны. Локтіс врач дорӧ да зэв збыльысь корӧ.
— Кодируйтӧй менӧ сёйӧмысь, мед некор эськӧ кынӧмӧй эз сюмав.
Н. Щукин томсяньыс на лэдзис зыр пасьта тош. Кулӧмдін районса ӧти сиктӧ теплоход вылысь чеччигӧн берегдорса йӧз жалитӧны:
— Татшӧм пӧрысьсӧ, коньӧрӧс, мый и кыскалӧны сиктъясӧдыс.
А берегӧ чеччысь гижысьяс пӧвстын сійӧ медтомыс.
