* * *

Гажа ягъясті дыр ветлӧм бӧрын
Койтысь дозмӧрӧс пищальысь лыйи.
Вӧрлысь сёрнисӧ орӧдіс шӧри
Гора йӧлӧга омлялігтырйи.

Месянь неылын сулалысь пожӧм
Видчан гӧлӧсӧн дугдывтӧг шувгис.
Воддза радлунӧй кытчӧкӧ вошис, —
Быттьӧ пармаыс ме вылӧ увгис.

Ӧти сьылысьӧн гӧльмис ас вӧр-ва,
Матын шогаліс-бӧрдіс мӧд сьылысь.
...Сэксянь пищальӧн ог нин ме вӧрав,
И ог каитчы ни ӧти сыысь.