ЭН КӦСЙЫ ЛОНЫ


Эн кӧсйы, вокӧй,
	тэ поэтӧн
	некор лоны.
Он кӧ кӧсйы
	позтӧм кӧкӧн
	нэмтӧ овны...

Кодлы сиис
	сыӧн лоны,
	сійӧ — коньӧр морт:
Оз тӧд аслыс
	инсӧ шоныд — 
	ӧтка, ӧтка орт...

Лунсӧ сійӧ
	олӧ вӧтӧн,
	войсӧ — пукӧ дыр;
Ставыс муса,
	ачыс — ӧткӧн,
	ӧткӧн олӧ пыр...

Сьӧлӧм сылӧн
	сотчӧ-потлӧ,
	колӧмыс — дзик тшыг.
Сӧмын сійӧ
	аснас пӧтлӧ,
	кодыр олӧ «дыр»...

Ёна лоӧ
	сьӧлӧм дойдны,
	бурмысь некор оз;
Ытва ваӧн
	Сійӧ ойдлӧ,
	косьмӧ — шорӧн моз.

Лоӧ сылы
	уна кывны,
	сетны — этша зэв;
Оз и сяммыв
	серсӧ кыны, — 
	панасыс зэв кузь!..

Панас ыджыд,
	кыан — этша,
	оз судз сэтчӧ сер:
Кӧсъян шуны
	«чорыд, зумыд»,
	тэнад лоӧ нэр.

Сідзи олӧ, — 
	асьсӧ косьтӧ,
	некор кӧть оз узь:
Шӧртсӧ каттьӧ,
	каттьӧ, каттьӧ...
	Панас — ойя кузь!