ДЗЕБАНІНЫН


Со тай синмыс перйӧм,
Куйлӧ тыртӧм юрчась,
Петӧм сыысь мывкыд,
Оз сёрнит, оз курччась.

Сэтшӧм овтӧм керка,
Ыджыд туйысь ылын,
Восьса ӧшиньясас
Шутьлялӧ тӧв сылӧн.

Ой, та юрчась коркӧ
Уджалыштіс вемнас,
Шогкӧд, лёккӧд, гӧлькӧд
Мыйкӧ вийсис нэмнас!

Ой, та юрчась коркӧ
Ыджыд думӧдз воліс,
Колис миян юрӧ,
Мыйӧн ачыс оліс.

Ой, мый тыртӧм юрчась
Тӧлӧдӧ нин ӧні
Пытшкӧссьыс, йӧз сійӧс
Ӧнӧдз куралӧны.

Миянлы нин зэв важ
Сійӧ кадса выльыс,
А пыр сылысь сёям
Буксьӧм-дуксьӧм мыльӧс!