ДУЧЕАпеннины — ыджыд кок, Муссолини — дуче. Гитлер сылӧн друг и вок — Канцлер... прусс... могучӧй! Воліс Римӧ Риббентроп, Нимкодясис дуче: — Мыйла меным тӧдны шог? Русь Сӧветскӧй усьӧ. Ыстам сэтчӧ лыдтӧм полк, Пырам юкны пайӧ. Гитлер менам — друг и вок, Содтӧд муяс вайӧ. — Шонді гӧгӧр ветліс Му, Дуче воштіс глянец: Эз вай рочысь лы ни ку Ньӧти итальянец. Усис Ливия, Алжир, Аттӧ, ыджыд аныд! Апеннинскӧй кузь кок ныр — Дучелы жӧ паныд. Апеннины — ыджыд кок, Муссолини — дуче. Гитлер сылӧн — друг и вок, — Интереснӧй случай! Сунис йылын кутсьӧ Рим, Личкӧ рать британскӧй. Турин карын властелин — Дуче итальянскӧй. Генуяын ыджыд бунт, Пӧдтыны пыр колӧ. Но оз лэбзьы «Фокке-Вульф» , — Гитлерысь зэв полӧ. Со немецкӧй офицер Йӧвсӧ юӧ маӧн. Дуче — Турин карса мер — Тыртӧ гадь... лӧз ваӧн. Апеннины — ыджыд кок, Муссолини — дуче. Гитлер сылӧн — друг и вок, Канцлер... прусс... могучӧй! Куш лӧз ваӧн? Нинӧмтор! Овны ещӧ позьӧ. Сьӧкыд, лишнӧй кызан кор, Бӧрӧ сэк ни водзӧ. Дуче сідзи нин кыз морж, Тшӧгсьыс ӧдва ружтӧ. Кыдз нӧ корас Гитлерлысь Шпиг да еджыд пызьтор? Оправдайтны ассьыс ним Сы водзын на колӧ. Сы вӧсна, мый воштіс Рим, — Абу ёна долыд! — Кутшӧм выльтор? — юалӧ Генераллысь дуче. — Тыш народнӧй гыалӧ, Кытчӧ кӧть он тувччы. — Мый нӧ?... Партизанъяскӧд Тӧкӧдчыны нинӧм. Найӧ мед эз вӧвны рӧд, Бырӧдны став вынӧн! — Гашкӧ, збыльысь эськӧ, дерт, Дуче ставсӧ найӧс Бырӧдіс, но шуд эз пет, — Каттис туйсӧ райӧ. Милан площадь вылын йӧз Видзӧдӧны туша — Сьылі топӧдӧма гез, Ӧшалӧ сэн дуче. И, кӧть кор, век лоас тадз: Сэк, кор йӧзлысь сьылі Зільӧ топӧдны палач, Вичмас гез и сылы!
