ЧЁРНӦЙ МОРЕ


Сё рӧмӧн ворсӧ Чёрнӧй море,
Сы чужӧмбанын абу мудз.
Зэв вылын сылӧн паськыд морӧс,
И помтӧм отсӧ син оз судз.

Ме чайтлі тэнсьыд, Чёрнӧй море,
Дас судта керка ыджда гы.
А тэ жӧ вувзьысьтӧг, лӧнь горӧн,
Ас ногыд тэчан сьыланкыв.

Тэ весьтын чипсасьӧ дзор чайка,
Лӧз ваас инмӧдыштлӧ борд.
И сола сынӧдсьыд, ме чайта,
Оз умлы тані шойччысь морт.

Ӧд тэнад зарни пляжъяс вылын
Пӧсь лыа быттьӧ рудзӧг пызь.
Сюрс йӧзлысь сёрни тані кылан,
Тан пуртікасьӧ коді кыдз.

Но петлӧ тӧв ныр — скӧр да дурысь,
Тэ сэки ачыд — абу ас:
Сэк тэнад пашкыр еджыд бурысь
Руд изъя берег зырны дась.

Кор тӧвлӧн скӧралӧмыс лаймас,
Кор босьтчас ойбыравны му,
Тэ сэки куйлан блюдйын чай моз,
Тэ весьтын кыптӧ шоныд ру.

Эг аддзыв ӧнӧдз ловъя море —
Ме босьтла сылысь соддзӧ гы,
Ас пытшкын медым нуны гортӧ
Лӧз мореыслысь мич и шы.

Евпатория.