АС ЧВЕТ


1.

Эм сэтшӧм дзоридз —
сылы абу нимыс...
и быдмӧ кӧнкӧ
пыді пемыд вӧрын...
Ылісянь чукӧстчылӧм сылӧн —
лов вад йирӧ...
Ме мӧдӧдчыла...
вошны туйсьыс дыр-ӧ...
Мен кывмӧн сӧмын
чветлӧн сьӧлӧм выныс...
Но тӧда —
кытчӧдз судзӧ
югӧр асъя...
Сэн быдмӧг разьӧ
гӧрддзым...
Чветӧн ӧзъяс...
И тайӧ би кывсӧ кӧ
аддза —
ме морӧс вылам
перна пыдди
пукта сійӧс.

2.

И новлӧдлі лов пытшкын
лыдтӧм дзоридз...
И нэм чӧж ӧкті чветсӧ
морӧс бердам...
И чайтан —
мичыс тайӧ
коркӧ эндас?..
А ӧтпыр...
лэбны пондас
ыръян лолӧй...
му весьтӧд
катшасина югыд
зэрӧн...

3.

Корси быдлаысь...
но некытысь эз сюр...
Ас чветлӧн лолыс
сэтшӧм быттьӧ тӧдса...
Но туйыс сы дінӧ кӧ
меным пӧдса?..
Да ордымӧс кӧ помӧ
зыбуч нюр?..
Судзӧдча кыв-ворӧн...
Та вылӧ ойлун * этша...
Но менам дзоридзыс ӧд
мывкыда и этша...
И сійӧ виччысьӧ...
И ловнас —
вына тун...

4.

Ас чветыс восьтӧ корсӧ —
ичӧт борд...
Ме лоа сэки орчча турун сіӧн...
инмӧдча бордйӧдзыс
веж небыд киӧн...
Лэбавны кужтӧгыс на чветыс оз и вӧзйысь...
Сы пытшкын — аддзан —
олӧ мыйкӧ ӧзйысь...
И тіпкысь сьӧлӧмыс —
му сайын мырдгӧрд шонді —
оз тыдав сійӧ...
Но ӧд регыд пондас...