ЧУЖАН ГОРТЫН Мамӧлы да Агния чойлы1 Коръяс гылавтӧдз Лымйыс усис. Ар-ӧ, тӧв эськӧ Тайӧ шусьӧ? Ноябрь тӧлысь на Восьтіс ӧдзӧс. Трачкакылӧ нин Тӧвся кӧдзыд. 2 Сэзьдӧм енэжлань, Кельдӧм тӧлысьлань, Ломтӧм пачьяссянь Тшыныс кайӧ. Асъя югдігас Чужан сикт весьтын, Ловлӧн кыпалӧм Меным тайӧ. Ен ув пельӧсын Бара пукала, Табак тшыныс Оз дӧзмӧд менӧ. Чойӧй куритчӧ, Мамӧ пачводзын Васька каньнымкӧд Воис венӧ. Йӧвсӧ шонті-а, Он и сёй пӧ тэ, Плешкад печикта «Кызъюровлы»! Мӧдыс чери ли Яй на корӧ. Чужан гортын куш Тадзи овлӧ. Сэсся некытысь Татшӧм шоныдыс Менам сьӧлӧмлы Эз на сюрлы. Кӧть и аттьӧсӧ Шуны позьӧ Меным йӧзсяньыс Воӧм бурлы. 3 Куимӧн на панясям Ӧти пызан сайын. Тайӧ меным олӧмын Югыдлунсӧ вайӧ. Сетӧ чужны сьыланлы, Лёк йӧзысь не повны. Синва пыр, но серамӧн Накӧд орччӧн овны.
