ЧЕЛЯДЬДЫР

Время уходить, время говорить «прощай» своему «я»...
Д. Г. Лоуренс

Тэ мунан ме дорысь...
Ме сӧмын восьтышті ӧдзӧсӧс
Лэбалысь лымйыслы,
А тэ мунан...

И кодзувъяс
Сылӧны нюжӧдӧм киӧ,
А кажитчӧ — зэрӧ.
И воськовъяс —
Лымъялӧм лов вывті —
Енэжас.
Тэ мунан ме дорысь...
Ме сӧмын восьтышті ӧдзӧсӧс
Еджыд ва помтӧм тӧлас,
А тэ мунан...

...А помнитан, тӧрыт на —
Ловъяӧсь вӧліны лэбачьяс,
И туруныс вӧлі —
Енэжӧдз.
И чуксасьысь арсяньыс
Кодікӧ енъюгыд лымсӧ,
Быттьӧкӧ вижъюр,
Пӧльыштіс
Лоланым кусӧм нин гожӧмсьыс...

Ар.
И кодзувъясыс руын,
Быттьӧ войтъяс
		шоныд черань везъясын.
Ми мунам
И видзӧдам пыдӧстӧм гӧпъясас...
А наын —
		кодӧскӧ корӧны коръяс,
		и миян синъяс,
		и лэбачьяс —
		тшын рӧма кельӧбӧн
		кольӧны вуджӧрсӧ Тӧлысьӧ...

...Аски тӧв.
И ме муна.
Бӧръя теплоходнас.
И кольӧны ваас — коръяс...
И тэ котӧртан,
Котӧртан ме бӧрся
			пемыд ва вывтіыс...