БУДИЛЬНИК
Важӧн бензопилатӧгыд пестӧ кералӧмыд зэв ыджыд удж вӧлі. Чукӧртчылісны куим-ӧ-нёль семья да помечӧн керасьлісны. Водзвыв пӧрӧдӧм пуяссӧ лэчыда кеслӧм пилаяс сёйӧмӧн сёйисны, вӧрыс сьыліс.
Унджыкыс пестӧ керавлісны гӧра-кӧдза помасьӧм бӧрын, видз вылӧ петтӧдз. Мукӧдыс водз тулысын чарӧм вывті заптысьлісны. А ми пыр гожӧм заводитчигӧн керасьлім. Помнита, кыдзи первой классын велӧдчигӧн батьӧ медводдзаысь вӧрӧ нуліс. Мый пӧ верман, сійӧс и вӧчан.
Мӧдӧдчим унаӧн, ӧкмысӧн ли дасӧн. Быдӧн мыйкӧ сьӧрсьыс нуис. Ме босьті будильник, мед тӧдны, дыр-ӧ уджавны. Бать да мам эськӧ эз тшӧктыны босьтнысӧ, но ме ассьым сині.
Воим места вылӧ. Пуяссӧ бать пӧрӧдлӧма нин, увйӧма, ув-лыссӧ чукӧртӧма. Квайт нывбаба куим пӧперечкаӧн босьтчисны пилитчыны, а кыкӧн поткӧдчыны. Бать, кыдзи кӧзяин, вӧчис чипас места. Меным шуис:
— Тэ вай шыблав песъяссӧ меланьджык.
Меным радыд, мый сідзжӧ удж вичмис. Босьтчи. Кокни песъяссӧ шыблала, сьӧкыдъяссӧ бать дорӧдз нуа. А бать найӧс кык пожӧм коластӧ тэчӧ.
Ставыс эськӧ бур, да номйыс... Синъястӧ восьтны он лысьт. Сӧмын на кузь тӧв бӧрын петісны да зэв лютӧсь. Кытчӧ пуксясны, сэтчӧ и сатшкысьӧны. Оз тай корсьысьны, кыті небыдджык да чӧскыдджык. Тані, нюр бокас, найӧ сьӧдӧсь да гырысьӧсь, вильӧдны морттӧ ловъявывсьыс вермасны. Бать шуӧ: «Он жӧ номлы сетчы. Ӧдйӧджык лег дай». Оз быттьӧ аддзы, дзикӧдз нин пӧсялі да. Нинӧм он вӧч, быть уджав. Няргыны кутан, ыджыдджык вокъяс серам выв лэптасны.
Пажынӧдз кык сывъя куим чипас артмис. Яг нӧрыс тырис пожӧм сир кӧрӧн. Батькӧд ми мӧдӧдчим чай пузьӧдӧм вала. Кӧнкӧ пӧ нюрысь ёль петӧ да сэтчӧ. Бать ведра босьтіс, ме — чайник. Васӧ ми матысьджык аддзим. Зэв джуджыд пашкыр коз, ён тӧлысь буракӧ, вужнас пӧрӧма. Вужля бокас и ваыс вӧлӧма. Кӧдзыд, синва кодь сӧдз. Надзӧникӧн, мед оз гудыртчы, кружкаӧн тыртім чайниксӧ и ведрасӧ.
— Зыр кӧ вӧлі, позис эськӧ кодйыштны: сэсся кӧть ведраӧн гумлав, — шуис бать. — Тэ бура видзӧд, кыті мунны кутам, гашкӧ, ваысла выльысь тэныд котӧртлыны ковмас.
Ковмис и эм. Ведрасьыд ваыс ӧти здукӧн бырис, сэтшӧм ёна уджалысьясыдлӧн горшныс косьмӧма. Босьті ведрасӧ да мӧдӧдчи вала. Пилитчыны дугдісны да, шы ни тӧв. Кыті мунны, туйсӧ тӧда. Со коз пӧрӧма, муӧдзыс абу воӧма, улӧдыс колӧ ляпкӧдчӧмӧн мунны. Сэсся чардбиӧн чашкӧдлӧм коз мыр воас, а сэсянь и вужляыс тыдовтчас. Сідзи и лоис. А вужля дорысь ме аддзи... йӧраясӧс. Миянлысь ванымӧс юисны. Ӧтиыс ыджыд, гашкӧ мамыс. Мӧдыс ичӧт на. Ме кынми места вылам. Ог лысьт вӧрзьӧдчыны, мед эз повзьыны найӧ. Видзӧда горша. Он быд лун йӧраяскӧд паныдась, а ме дзик на первойысь аддзи. Дыр видзӧді, кыдзи юӧны вӧрса мӧсъясыс. Дугдылӧмӧн, шойччӧмӧн. Гашкӧ, миян моз жӧ виччысисны, кор ваыс сӧдзас.
Мунісны, ме матыстчи вужля дорӧ. Вӧрыс ӧні эз нин вӧв сэтшӧм шуштӧмӧн. Орччӧн ловъяяс эмӧсь, ӧтилаысь миянкӧд васӧ юӧны. Вои да висьталі батьлы, мый ванымӧс йӧраяс тшӧтш юисны. Эз пӧ найӧ миянлысь юны, шуис бать, а ми пӧ налысь неуна босьтыштім.
Пажын бӧрын эз вӧв окота чеччыны небыд нитш вылысь да бара шыблавны-новлыны песъяс. Юр весьтын, мыр вылын тотшкис будильник. Ме босьті сійӧс да и вешті стрелкаяссӧ кык час водзӧ. Ог тӧд, мыйла ме тайӧс вӧчи. Мӧвпын эз вӧв, мед водзджык гортӧ мунны дышла ли, номйысь ли, а со тай вешті. А гашкӧ, окота лоис регыдджык ошйысьны ёртъяслы, мый йӧраясӧс аддзылі? Код тӧдас...
Бать, аддзылӧма ли, мый ли будильник дорад матыстчылӧмтӧ да ачыс локтіс мыр дорад. Видзӧдліс да кутіс шензьыны: «Мый нӧ часіыскӧд лоӧма, шондіыс зэв на вылын, а сизим час нин петкӧдлӧ? Дивӧ тай. Дзоньтавны ковмас сетлыны».
Час кык на мырсим. Воим гортӧ. Стенын ӧшалысь часі сизим часысь петӧм петкӧдліс, а будильник вылын ӧкмысысь нин вӧлі петӧма.
— Мӧдысь тадз эн вӧч, пиӧ, — шуис бать.
Ӧні на кыла тайӧ шуӧмсӧ.
