БАРА МЕ АС ЧУЖАН МУЫНБара ме ас чужан муын, ас карын. Ме гӧгӧр войтырыс мелі и варов. Татӧні сынӧдыс кыпыд и сӧстӧм, Муслунлысь бикиньтор сьӧлӧмӧ ӧзтӧ, Тӧд вылӧ вайӧдӧ зэв унатор — Ставсӧ, кыдз визувтіс олӧмлӧн шор. Коркӧ со роч буквар куті ас киам — Лыддьысьны велӧдчи сартаса биӧн. Пукалі лабичын пеша вор дорын, Букварлысь кывъяссӧ пычикті нора. Мый йылысь лыдди, эг велав, эг тӧд — Нач пеша ворйыс кодь вӧлі ме сьӧд! Мамӧ со йӧв туис сетіс мем киам: «Вузавны карӧ ну тайӧс, бур пиӧй!» Кар пасьта горза ме: «Молоко кому?» Ветлӧдлі кар кузя помсяньыс помӧдз. Вӧзйи ме, горӧдлі, гашкӧ, сё пӧв... Мокасьтыд, некод эз ньӧб менсьым йӧв. Сэк вӧлі карад нёль тысяча олысь... Ӧні ӧд сё сюрсӧс лыддьыны колӧ! Войтырыс помсяньыс помӧдзыс мӧд нин: Весигтӧ пешалысь нимсӧ оз тӧдны. Быдӧнлӧн керкаас чардби кодь би. Биватӧг, истӧгтӧг ломзьӧдам ми. Туй вылын, няйт пиын телега дзуртӧ... Пукалан сэтӧн да ӧшӧдан юртӧ. Ӧні со автобус ветлӧдлӧ скачӧн, Самолёт енэжӧ кутш этшӧн качӧ, Грымӧдӧ парматі сюрс пудъя вӧв — Йиркӧдӧ быттьӧкӧ бушкола тӧв. Сап пемыд олӧмыс ылӧ зэв вешйис, Сӧветскӧй власьт дырйи вуж выйӧн вежсис, Ӧні со грамота тӧдтӧмъяс шочӧсь, Книгаяс лыддьӧны комиӧн, рочӧн. Культура кыпалӧ, сӧвмӧ — оз узь. Туй сылӧн югыд и веськыд, и кузь. Бара со ас чужан муын, ас карын. Ме гӧгӧр войтырыс мелі и варов. Татӧні сынӧдыс кыпыд и сӧстӧм, Муслунлысь бикиньтор сьӧлӧмӧ ӧзтӧ, Тӧд вылӧ вайӧдӧ зэв унатор — Ставсӧ, кыдз визувтіс олӧмлӧн шор.
