АСКИА КОЛХОЗНИКЛЫ


Асылын вӧр пу йыв шондіӧн кисьмӧ,
Надзӧник лун тӧлыс важ лыссӧ кисьтӧ.
Сиктъясын пу гӧръяс стен бокын сісьмӧ,
Сы пыдди плугъяс да тракторъяс письтӧ!

Колхозъяс ёнмӧны, ӧтарӧ кыптӧны,
Фабрикъяс, заводъяс оръявтӧг гыпкӧны.
Збыльвылӧ дорсьысьӧ выль нога олӧм!
Чинӧ нин пикъясӧ волӧм.

Гӧрысь! Казьтышт вай кольӧма кадсӧ,
Му вылад гӧрӧмтӧ, важ ногса ладсӧ.
Мый тэнад ӧтнадлӧн мырсьӧмысь кольӧм?!
Мый вӧсна малаліс пыр тэнӧ полӧм?!

Мӧвпышт! Кыдз гӧригӧн пыр вӧлі сӧран.
Вӧлыд оз туй вӧлі, равӧстан скӧрӧн.
Казьтыштан лёкысь пыр батьтӧ да мамтӧ,
Сьӧкыдла вынйӧрыд надзӧник ланьтӧ.

Рыт сёрӧн сойясыд ёнгӧмӧн висьӧ,
Мудзӧма синъясыд лазгӧдчӧ, куньсьӧ.
Курыд шог пальӧдны самӧкур кисьтан,
Рушкутӧ польдӧдан, аскинас висьман.

Гӧгӧрво! Тыр синмӧн видзӧдлы, кывзы!
Важ олӧмсӧ ӧдйӧджык пызйы.
Веськыд зэв уджалысь войтырлӧн туйыс. —
Ӧтувтчы! Паськыд зэв лоас сэк муыд.

Пуксям сэк тракторӧ, жургӧмӧн мӧдам,
Колхозлысь паськыд му гӧран вель уна.
Долыда «кӧрт вӧвкӧд» ӧтвылысь сьылан,
Фабриклысь-сиктлысь йитӧдсӧ кылан.