АРСЯ ЛУНӦ

Лунтыр сільгис-зэрис кӧдзыд зэрӧн. Рытладор тӧлыс бергӧдчис. Лои вой тӧла. Ыркнитіс. Войбыд уси лым. Асывнас ывлаын лои гӧгӧр еджыд. Керка вывъясӧ и, потшӧс вывъясӧ и, — быдлаӧ ӧшйӧма лым. Ставсӧ вевттьӧма; видзьяс и, муяс и. Вӧръясысь локтісны сиктӧ став лэбачыс, коді абу удитӧма на лэбзьыны шоныдінӧ да коді абу на удитӧма поздысьны тӧв кежлӧ. Сэні и гӧрд юра пыстаыд, би кодь гӧрд морӧса жоньыд и, джияныд и, быдӧн. Катшаяс весигтӧ тшӧтш сэнӧсь, китшсьӧны майӧгъяс йылын, бӧжнысӧ лайкйӧдлӧны. Кӧдзыдыд да тшыглуныд тай быдӧнӧс вӧтлӧма. Йӧрысь йӧрӧ лэбалӧны лэбачьяс, корсьӧны сёян. Ставныс зэв рамӧсь. Челядьяслы сійӧ и колӧ: киськалӧны кӧнтусь да шыдӧс. Посни лэбачьяс сэтчӧ тӧждысьтӧг уськӧдчӧны чукӧрӧн. Нинӧм тӧдлытӧг, вежӧртӧгыд и шедӧны дзугйӧ. Коньӧръяс, ёна жӧ эштанныд кынмыны тӧвбыдӧн да тшыг пыкны!